"Осындай болашағы жоқ нәрселерге әуеспіз": Меценат қоғамымыздың қателігін атап өтті
Жақында Qazaq.today ақпараттық порталына сұхбат берген меценат Көңілбай Шүкенов қоғамымыздың қателігінің бірі ретінде ашылмай жатып жабылған зауыттарды атады.
"Қазақстанның негізгі қателігі – халықаралық талаптарға сай деген зауыттарды салу. Қымбат жоба болса да, ондағы өнімге, оны өткізуге есеп жасамайды. Президент тетікті басады. Зауыт жұмысын бастағанмен, өнімі бәселелестік ортаға жарамай қалады. Технологиясы жобаға сай болмай шығады, құны да аспандап кетеді. Ақыры зауыттар жабылып тынады. Осындай болашағы жоқ нәрселерге әуеспіз." деді кәсіпкер.
Қоғамда келелі істерімен жиі көрініп жүрген кәсіпкер былтыр елімізде орын алған қаңтар оқиғасына қатысты да өз ойымен бөлісті.
«Қаңтар оқиғасы» қайталануы мүмкін бе? деген журналист сұрағына «Қаңтар оқиғасы» аяқ асты шыққан жоқ. Оның бәрі жүйелі түрде ұйымдастырылған. Хаостың басқаруға көнетін, көнбейтін түрі болады. «Қаңтар оқиғасы» басқаруға көнетін хаос болды. Ол дегеніміз – алдын-ала бәрі шегеленіп, шешілген жағдай. Оның қайталану-қайталанбауына келсек, бірінші ол біреулерге керек па? Керек болса қайталанады, керек болмаса – қайталанбайды. Халықтың бұл жерде ешқандай қатысы жоқ. Кез-келген халықты басқаруға көнетін, басқаруға көнбейтін хаосқа айдап баруға болады. Кландық тартысқа қатысты көп нәрсені айтпай-ақ қояйын. Әр кезде де осындай үлкен билеушілер кеткеннен кейін артында қалған-құтқандардың бәрі бір-бірін жеп, өлтіріп, таптап, айыптайтын жағдай тарихта көп болған. Қазақстанда сондай болмасын деген негізбенен алғашқы президент өз еркімен, уақытылы Тоқаевқа мандатын тапсырып кетті. Онымен келіспейтіндердің әрекетін көрдіңіздер. Қазіргі уақытта қай клан қалды, кім қандай кландармен «соғысып» жатыр. Оны қоғам көріп, біліп отыр." дейді Көңілбай мырза.
