«Жаз» өлеңінде қай жер сөз болады?

Абайдың «Жаздыгүн шілде болғанда...» деп басталатын өлеңінде суреттелетін жайлау Ботақан ошағы екені рас па?
Ләззат Молдағалиева, Қарағанды қаласы
Ғалымдар «Жаз» өлеңінде Ботақан оша­ғы және Бақанас, Байқоңыр өзендері бо­йын­дағы басқа да жайлаулар бейнелене­тінін айтады. Өлеңге жаңа қонысқа, жазғы мекен­ге көшіп келіп, қым-қуыт тірлігіне жан бітіріп жатқан қазақ ауылының көрінісі арқау бол­ған. Мұнда ақын жайлауға қоныстанып жат­қан қауымның бар қимыл-әрекетін өлең тілінің кереметін пайдалана отырып, айшық­ты жеткізеді:
...Қыз-келіншек үй тігер,
Бұрала басып былқылдап,
Ақ білегін сыбанып,
Әзілдесіп сыңқылдап.
Мал ішінен айналып,
Көңілі жақсы жайланып,
Бай да келер ауылға,
Аяңшылы жылпылдап...
1995 жылы жарық көрген «Абай» энци­к­лопедиясында да бұл өлеңде Ботақан жай­лауы сөз болатыны айтылады. Өлең 1886 жылы жазылған. Ол қазақ поэзиясын­дағы жазғы табиғат суретінің ең биік үлгісі санала­ды. Айта кетейік, бұл қоныста Абай мен Ділдә үйленген.