Табиғи гүлді қайткенде ұзақ сақтаймыз?
Әдемі гүлдерді қанша қымбат болса да, сатып алып жатамыз. Бірақ олардың сол ақыны ақтамай, солып қалатынын көргенде кішкене налимыз. Оларға ұзағырақ сақталуы үшін не істеу қажет?
Мәдина ЕРІКҚЫЗЫ, Алматы қаласы
Гүл өсірушілердің айтуынша, ең алдымен гүлді мұқият кескен жөн, сондай-ақ оны салатын ыдыс қолайлы болуы қажет. Әдетте, гүл шыны не фарфор вазаларға салынады. Металдан жасалған ыдысқа гүл шоқтарын салуға болмайды. Өйткені металл иондары гүлді улайды. Гүл көп тұру үшін бір вазаға бір ғана гүл шоғын салу керек. Құмыраға құйылған су да онша суық болмауы тиіс. Ол үшін суды алдын ала құйып, бөлме температурасына екі-төрт сағат бейімдеу керек. Гүлді құмыраға салып тұрып, қиғаштай кесу оның көп сақталуына себеп болады. Ал егер құмыраға салмай, ауада кесетін болсақ, гүлдің кішкентай ерітінді жүретін түтікшелеріне ауа мен бөгде микроағзалар кері әсер етуі мүмкін. Мұндай жағдайда гүлдің қоректенуі нашарлап, ол тез солады.
