Суыққа қалай бой үйретуге болады?

Суықтан менің аллергиям қозады. Кішкене аяз басталса бітті, денем күлдіреп, қы­зыл бөрткендер пайда болады және қатты қышиды. Мұндайда не істеуге болады?
Нұржан ЕРБОЛАТ, Орал қаласы
Аллерголог-дәрігерлер мұндай қолайсыз­дықпен денені суыққа үйрету арқылы күресуге кеңес береді. Әрине, аллергияға қарсы түрлі дәрі-дәрмектер бар. Бірақ оларды пайдалана отырып, сіз аллергияның түпкі себебін емес, тек сыртқы белгілерін ғана жоя аласыз. Сондықтан денені шынықтырғаннан абзалы жоқ. Бірақ оның өзін бірте-бірте бастау керек. Мысалы, әуелі суық суға шыланған сүлгімен сүртіну, суық су құйыну сияқты процедураларды қолданған жөн. Температураны күрт төмендетіп жіберуге болмайды. Одан дене шошынып қалуы ық­тимал.
Бастапқыда үстіге құйылатын су 36-38°, ал бірнеше күннен кейін 35-37°, үш аптадан ке­йін 34-36° шамасында болуы тиіс. Егер су құ­йыну кезінде терінің беті күлдірей бастаса, судың температурасын 1 градусқа көтеру керек те, бес-алты күнсіз төмендетпеген абзал. Осылайша, жыл бойына температураны +10°-қа жеткізуге болады. Салқын су құйынып ем­дел­геннен кейін денені міндетті түрде түкті сүл­гімен қызарғанша ысқылау керек.