Сотталғанды өзге түзеу мекемесіне қалай ауыстыруға болады?
Туысқанымыз қылмысты болып, сотталды. Оны Алматыдағы түзеу мекемесінен Қызылорда қаласындағы түрмеге қалай ауыстыруға болады? Оның ата-анасы Қызылордада тұратын, соған ауыстырылса, жақсы болар еді. Бұл үшін қандай өтініш жазу қажет?
Ақмаржан СЕРІКҚЫЗЫ, Қызылорда облысы
ҚР Әділет министрлігі мамандарының мәліметінше, «Қазақстан Республикасы Әділет министрлігінің түзеу мекемелеріндегі арнайы есепке алу бөлімдерінің (бөлімшелерінің, топтарының) жұмысын ұйымдастыру жөніндегі нұсқаулықты бекіту туралы» Қазақстан Республикасы әділет министрінің 2001 жылғы желтоқсандағы №150 бұйрығының 116-тармағы 2-тармақшасына сәйкес, сотталғандарды бір түзеу мекемесінен екінші түзеу мекемесіне ауыстыру туралы мәселе сотталғанның немесе оның жақын туысқандарының арыздары негiзiнде және ерекше жағдайлардың барын растайтын құжаттар болғанда жүргiзiледi. Сотталушыны бір түзеу мекемесінен басқа мекемеге ауыстыру туралы жазылған өтінішке қоса мынадай құжаттар берілуі қажет:
– сотталғанмен туысқандық байланысты растайтын;
– мекенжайды растайтын;
– отбасы құрамы және айрықша жағдайларды растайтын құжаттардың көшірмесі.
