Қазақстан территориясының қанша бөлігін қорықтар мен ұлттық парктер алып жатыр?
Сұрағыңыз өте орынды. Кеше бүкіл әлем Халықаралық қорықтар және ұлттық парктер күнін атап өтті. Осы орайда Орман және аңшылық шаруашылық комитетінің таратқан деректеріне сүйенсек, Қазақстандағы ерекше қорғалатын территорияның жалпы көлемі 22 млн гектар немесе мемлекет территориясының 8,2 пайызын құрайды. Елімізде барлығы 10 мемлекеттік табиғи қорық, 10 мемлекеттік табиғи ұлттық парк, 4 мемлекеттік табиғи резерват, 50 мемлекеттік табиғи кіші қорық және 5 мемлекеттік қорық аймағы бар. Қазіргі таңда Қазақстан Республикасының Қызыл кітабына 387 өсімдік түрі, 125 омыртқалы және 96 омыртқасыз жануарлар түрі енгізілген. Бүгінде мемлекеттік қорықтар мен ұлттық парктерді қорғау жөнінде екі бағдарлама бар. Біріншісі – «2030 жылға дейін ерекше қорғалатын табиғи территорияларды анықтап, оларды қорғауды дамыту концепциясы», екіншісі – «2010 жылға дейін су ресурстарын тиімді пайдалану, жануарлар әлемін сақтау және ерекше қорғалатын аймақтар желісін кеңейту бағдарламасы».