Микромемлекеттер қандай мемлекет?

Мен Седанг деген микромемлекетті естіп, саяси картадан іздеп таппадым. Шынымен, бұл мемлекет картада жоқ па? Жалпы, микромемлекет деген не екен өзі?
Батырбек ҚАЛШАБАЙ, оқушы
Қызық сұрақ екен. Алдымен микромемлекет дегеніміз – оны құрушылардың виртуалды түрде, қағаз жүзінде, Интернетте жасанды мемлекет құру жобасы. Ондай мемлекеттер шағын саяжай телімінде немесе титтей аралда орналасуы және оның халқы бірнеше адамнан ғана тұруы мүмкін. Микромемлекеттерді Ватикан, Люксембург секілді шағын елдермен шатастыруға мүлде болмайды. Микромемлекеттер формальді түрде мемлекеттік атрибуттарын иеленіп, өз монетасы, туы, пошта маркасы, паспортын шығара алады. Сіз сұраған Седанг микромемлекеті – осындай виртуалды ел. Седанг елі 1888 жылы 3 шілдеде Шарл-Мари Давид де Майрен деген француз авантюрисінің өз плантациясын корольдікке айналдыру арқылы қазіргі Вьетнам жерінде құрылған. Сол жердегі бахнар, ренгао және седанг тайпаларының көсемдері оны Седанг Корольдігінің королі етіп сайлайды. Астанасы – Кон Ганг. Алайда танылмағандықтан, территориясы картаға түспеген. Микромемлекеттердің бұдан басқа мысалы ретінде Силенд, Мельхиседека доминионы, Ладония, Ай консулдығы (Айды алаяқтықпен сату арқылы пайда болған), Молоссия, Орания, Минерва республикасы, Лакота республикасы, Гейлер мен лесбияндар корольдігін және т.б. айтуға болады.