Мемлекеттік мұражай мысықтар мекеніне айналды
Санкт-Петербургтағы Мемлекеттік Эрмитаж мысықтарға толып кеткен. Мұражайдың тышқан аулайтын мысықтарға зәру болып отырғаны туралы жалған қауесеттің салдары мекеме әкімшілігін мезі қылып бітті. Эрмитажды мысық асырайтын орынға айналдырмау үшін қызметкерлер арнайы акция жариялап, тұрғындардың жануарларды тегін алып кетуін сұрап отыр.
Мемлекеттік мұражайдың өзінің 50 мысығы бар. Олар жәдігерлерді кеміріп қоюы мүмкін тышқандар мен егеуқұйрықтарды аулауға жеткілікті. Бірақ Петербург тұрғындары арасында иесіз немесе балалаған мысықтарды Эрмитаж бен Қысқы сарайға әкеліп тастау әдеті әбден қалыптасқан. Жуырда мұражай әкімшілігі ресми мәлімдеме жасап, мекеменің мысықтарға зәру емес, керісінше, олардан әбден мезі болып отырғанын айтты. Енді наурыздың 20-сына дейін созылатын шара кезінде тұрғындар мұражайды мысықтардан арылтуға көмектесуі тиіс. Айта кетейік, Қысқы сарайға ең алғашқы мысық Екатерина ІІ әйел императордың тұсында Қазаннан әкелінген. Содан бері мұнда тышқан аулаушы «қызметкерлерге» қамқорлық көрсету мақсатындағы «Наурыз мысығы күні» акциясы өтіп тұрады.
