Тоқсаныншы жылдары Үкімет таратқан жекешелендіру инвестициялық купондары мен тұрғын үй купондарымыз бар.
Тілеуімбет НҰРМҰХАНБЕТ, Ақмола облысы
Осыған ұқсас сауалға қаржы министрі Болат Жәмішев мемлекеттік қызметкерлер блогында жауап берген екен. Оны мына сілтеме арқылы ашуға болады. https://blogs.e.gov.kz/blogs/zhamishev_b/questions/30187?lang=ru-RU
Министрдің сөзі «сізбен табысымен бөліспеген болса, акционерлік қоғамдарды сотқа бере аласыз» дегенге саяды.
Жекешелендіру инвестициялық купондары мемлекеттік мүлікті жекешелендіру мақсатында 1993-94 жылдары шығарылды. Жұрт купондарды өздерін жарнамалаған түрлі акционерлік қоғамдарға сеніп тапсырды. Оның нәтижесінде, Қазақстан халқы зауыттар мен фабрикалар, өзге де кәсіпорындардың акционері болып шығуы тиіс еді. Алайда іс жүзінде купон иелері кішігірім акционер ретінде тіркелмей,оларға ешқандай дивиденд төленген жоқ. Әрі мемлекеттік мүлікті иеленген АҚ-дар дүние-мүліктерін басқа кәсіпорындарға ауыстырып, банкроттық жариялады. Заң жүзінде құқықтық мұрагер компанияларға талап қоюға болады. Алайда бүгінге дейін мұндай шағым болған емес.