Күйсандық түрлерін айыра білу де – өнер
Қызым фортепиано мен пианиноның не айырмашылығы бар? Бұлардың дыбыс шығаруында қандай өзгешелік бар деп сұрап жүр? Ең алғаш бұл аспап қалай пайда болған? Толығырақ мәлімет бере аласыздар ма?
Жанна САДЫҚОВА, Шымкент
Фортепиано – рояль, пианино секілді шекті-пернелі аспаптардың жиынтық атауы, тіпті «атасы» деуге де болады. Ең алғаш бұл аспапты XVIII ғасырда итальян музыка шебері Кристофори ойлап тапқан. Бірақ сол тұста дәл осыған ұқсас күйсандықты Францияда Мариус, Германияда Шретер есімді шебер жасап шыққан.
Ал ең алғаш фортепианоға арналған шығарманы 1732 жылы Людовик Джустини жазып шықса керек. Содан кейін осы XVIII ғасырдың соңына қарай фортепиано әуендері көбейіп, жұртшылық ықыласына бөленген.
Пианиноның фортепианодан айырмашылығы – оның пернелерінің тігінен орналасуында. Ал фортепианода пернелер көлденеңінен орналасады. Сондықтан пианино рояльға қарағанда үйде шағын ғана орынды алады. Пианиноны тарихта тұңғыш рет 1800 жылы американдық шебер Хокинс жасап шықты. Алайда дәл бүгінгідей заманауи кейіпке бұл аспап тек ХІХ ғасырда ғана енген.
