FIFA-ға қанша ел мүше?
Бүгінде ең ірі спорт ұйымдарының бірі FIFA екені белгілі. Аталмыш ұйым қай жылы құрылған? Бүгінде оған қанша мемлекет мүше?
Қуаныш АНДРЕЕВ, Шымкент қаласы
Ресми түрде FIFA-ның туған күні болып 1904 жылдың 21 мамыры саналады. Сол күні Парижде жеті елдің басқосуымен әлемдік футбол федерациясын құру туралы құжатқа қол қойылған болатын. Оның алғашқы мүшелері Голландия, Швейцария, Дания, Бельгия, Франция, Швеция, Испания және Германия. Бір қызығы, Германия басқосуға өз өкілін жіберген жоқ, аталмыш ұйымға мүшелікке өткісі келетіні туралы телеграф арқылы білдірген. Ал FIFA-ның Еуропа мемлекеттерінен тыс ең алғашқы мүшесі – Оңтүстік Африка Республикасы.
Алғашқы 25 жылда ұйым тек бірнеше ерікті адамдардан ғана тұрды. Ал мүшелікке енуге ниет білдірген елдер 50 француз франкінен төлеуге міндеттелді.
Бүгінде FIFA-ға 208 мемлекет мүше. Ұйымның жылдық табысы 30 миллион АҚШ долларын құрайды. Ал оның президенті – швейцариялық маман Йозеф Блаттер. Айта кетейік, Қазақстан FIFA-ға 1992 жылдан бері мүше.
