Фестиваль бағдарламасы қандай?

Таяу күндерде дәстүрлі орындаушылардың «Ұлы дала сазы» атты халықаралық фестивалі өтетін көрінеді. Фестиваль бағдарламасына нақтырақ тоқталсаңыздар екен.
Гүлжан ҚАЙЫРҒАЛИ, Талдықорған
«Астана – түркі әлемінің мәдени астанасы, 2012» жылы аясында ұйым­дастырылып отырған дәстүрлі орын­даушылардың «Ұлы дала сазы» атты халықаралық фестивалі бүгін кешкі сағат18:00-де Астана қаласындағы К.Байсейітова атындағы Ұлттық опера және балет театрында өтеді. Концертте ҚР Халық әртісі Қайрат Байбосынов, Қазақстанның еңбек сіңірген қайрат­кері Е.Шүкіманов, А.Алматов тәрізді дәстүрлі әншілер мен ҚР еңбек сіңір­ген әртісі А.Үлкенбаева, ҚР мәдениет қайраткері Ж.Жүзбаев сынды дәстүрлі күйшілер және түркітілдес елдердің өнерпаздары өнер көрсетеді. Кон­церт­тік бағдарламаға Құрманғазы, Дәулеткерей, Қазанғап, Дина, Сүгір, Тәттімбет сияқты танымал дәулескер күйшілердің күйлері және қазақтың дәстүрлі әндері енгізілген.
Концертке ТҮРКСОЙ-дың, Түркітіл­дес елдердің ЮНЕСКО істері жө­ніндегі Ұлттық комиссиясының, Ха­лықаралық дәстүрлі музыка ұйымы­ның басшылығы және шетелдерден музыка зерттеушілері қонақ ретінде шақырылып отыр.  Іс-шараның бас­ты мақсаты –  әлемдік музыка өне­рі­нің дамуына айтарлықтай үлес қосқан қазақ және түркі халық­та­ры­ның дәс­түрлі музыкасын, соның ішінде әні мен күйін жан-жақты на­сихаттау, дәстүрлі музыкаға жүйелі түрде қам­қорлық жасау және түркі халықтары арасындағы мәдени байланысты жақындата түсу болып табылады.