Елімізде ағылшынша газет шыға ма?

Қазақстанда  ағылшын тілінде газет шыға бастады деп естідім. Жаңа басылымның атауы қандай және ол қандай аудиторияға бағытталған?
Ғабит РАБАТҰЛЫ, Алматы облысы
«Ақ Жайық» жауапкершілігі шектеулі серік­тестігі таратқан мәлімет бойынша, Атырауда ағылшын тілді оқырмандарға арналған West Kazakhstan Today газетінің алғашқы саны жа­рық­қа шықты.
Әзірге бұл жаңа басылымның алғашқы сан­дары «Ақ Жайық» газетінің қосымшасы ретінде таратылмақ. Кейін сұранысқа орай өз алдына жеке ақпарат көзіне айналмақ. Жоба авторларының айтуынша, бұл басылым  елі­міз­­дің мұнайлы өңірінде жұмыс бабымен тұрып жатқан шетелдік азаматтарға ғана емес, жергілікті тұрғындарға, ағылшын тілін жақсы меңгерген немесе енді оқи бастаған жастар үшін қызықты болмақ. Қалай десек те, елімізде ағылшын тіліндегі газеттің шығарылуы – ағылшынша сөйлейтін аудиторияға есептелген үлкен жобаның басы ғана.
West  Kazakhstan Today таралымы 16 мың да­на­ны құрап отыр. Ағылшын тілінде тек ай­мақ­тық ақпарат қана емес, сонымен қатар Қа­зақстанның қоғамдық-саяси, экономикалық, мәдени өмірі туралы баяндайтын материалдар да жарияла­нады. Бұл Қазақстанда жұмыс істеп жүрген ше­тел­дік азаматтардың бұл елмен жақынырақ та­нысуына жақсы мүмкіндік ту­дыр­мақ.