Экспрессионизмнің мағынасы нені білдіреді?
Экспрессионизм тіркесі қандай мағынаны береді. Өнердің қай саласында бұл термин жиі қолданылады.
Талғат Кәрібаев, Алматы облысы
Бұл – Еуропа өнері мен әдебиетінде шамамен 1905 жылдан 1920 жылдарға дейін дамыған бағыт. 20 ғасырдың 1-ширегіндегі әлеуметтік дағдарысқа жауап ретінде пайда болып, замани буржуазиялық өркениет жұтаңдығына қарсылық көрсету күшіне ие болды. Экспрессионизм 20 ғасырда кескіндемешілер П.Гоген (Франция), В.Ван-Гог (Голандия), Э.Мунк (Норвегия), Дж.Энсор (Бельгия) шығармашылығынан да көрініс берді. Германияда экспрессионистік бірлестіктер («Көпір», («Көк салт атты») пайда болды. Мұнымен бірге алғашқы кездері бұл бағыттың өкілдері шовинизм мен мистиканың реакциялық идеяларын да насихаттады. Екінші дүниежүзілік соғыстан кейін субъективтік-идеалистік өрісі мен асыра әсірешілдігі образ буалдырлығына, пошымды ретсіз бұзушылыққа, болмысты теріс бейнелеуге ұрындырып, нағыз антигуманистік бағыт алды. 1900 жылдың басында бұл бағыт музыкада да пайда болған. Ол композиторлар Г.Маллер, Р.Штраустың кейбір шығармаларында көрініс беріп, Венаның жаңа музыка мектебі өкілдері А.Шенберг, А.Берг және А.Веберн шығармашылығында өріс алды. Бүгінде бұл бағыт өнердің барлық түрінде жаппай көрініс таппаса да, арагідік кездесіп қалады.
