Бұзылған көкөніс қатерлі ісікке шалдықтырады

Қазір сауда орындарынан алынған жеміс-жидектер мен көкөністер салқын жерде сақталғанына қарамастан, өте тез бұзылады. Бақша дақылдарының бұзылған жерін кесіп тастағанның өзінде, оларды тұтынуға болмайтынын жиі естимін. Оның қандай зияны бар?
Жанар МҰҚАНҚЫЗЫ, Қарағанды облысы

Денсаулық сақтау саласы ма­ман­дарының айтуынша, бұзылған көкөніс­тер мен жеміс-жидектерді тұтыну адам ағзасына зиян. Сәл ғана дақ түскен кез келген бақша өнімінің бойында митоксин атты улы зат түзіледі. Көкөніс болмаса жеміс-жидектің бұзылған жерін кесіп тастағаннан жойылмайтын қауіпті зат адамның маңызды ор­гандары жүрек пен бауырды зақымдап қоймай, қатерлі ісікке ұшыратады. Сол себепті мүмкіндігінше жеміс-жидектер мен көк­өністерді аузы жабылатын шыны ыдыстарға салып, мұздатқышта сақтаған абзал. Ал көк жуа, аскөкті дымқыл орамалға орап, салқын жерге қою керек. Мұндай бақша өнімдері бірнеше күнге дейін бұзыл­мауымен қатар, бойындағы дәрумендерді де жоғал­тпайды.