Бозбала Нұрсұлтан жайлы сыныптастары не дейді?
Маған Тұңғыш Президенттің өмірі жайлы түсірілген «Балалық шағымның аспаны» деген көркем фильм қатты ұнайды. Әсіресе болашақ Президенттің жоғары сыныпта оқып жүргендегі сәттері қызық. Менің білгім келетіні, Мемлекет басшысымен сол кезде бірге оқыған, бүгінде арамызда жүрген замандастары не дейді? Фильм, шынымен де, өмірден қаз-қалпында алынған ба?
Сәния МАКСИМОВА, Ақтау қаласы
Режиссер Рүстем Әбдірашевтің «Балалық шағымның аспаны» фильмі Н.Назарбаевтың «Без правых и левых», «Эпицентр мира» және «В центре Евразии» атты әдеби естеліктерінің негізінде түсірілген. Елбасының сыныптастары көркем фильмнің, шынымен де, сол балалық, жастық шақты көз алдымызға әкелетінін айтады. Қазақстанның еңбек сіңірген мұғалімі, Н.Назарбаевпен бір сыныпта оқыған Күләш Әмірова бұл жөнінде былай дейді: «Нұрекең түр десе, түрі бар, бой десе, бойы бар жігіт болды. Барлық қоғамдық жұмыстардың алдыңғы шебінен табыла білетін. Сол жылдары біздің мектепке «ЖенПИ»-дің практикант бойжеткен қыздары келіп, сабақ беретін. Жастары сәл үлкен болса да, олардың кейбірі біздің Нұрекеңе сырттай ғашық болып жүретін. Біз де мұны сезетінбіз. 10-сыныпты аман-есен бітіргеннен кейін бірнеше жасты Теміртауға жолдамамен жіберетін болды. Көпшілігіміз, әсіресе қыздар жағы алысқа барғымыз келмей, бас тарттық. Ал екі-үш жігіт Теміртауға аттанып кетті. Олардың арасында Нұрсұлтан да болды. Ол сол кезде-ақ өз мүмкіндігін біліп, білімі мен біліктілігіне сенген еді».
