Балаларға арналған әндер жинағын қайдан аламын?
Жақында «балаларға арналған қазақша әндер жинағы жарық көрді» деп естіп едім. Оны қайдан алуға болады?
Гүлмира Пернебекқызы, Алматы қаласы
Қазақстанның Халық әртісі, Мемлекеттік сыйлықтың иегері Нұрғали Нүсіпжанов құрастырған «Біз балдырған баламыз, шырқап әнге саламыз» атты жинақ жуырда «Өлке» баспасынан жарық көрген болатын. Аты айтып тұрғандай, жинақта балаларға арналған әндер топтастырылған. Жинақтың жалпы редакциясын басқарған – белгілі публицист-жазушы Мереке Құлкенов. Барлық бүлдіршіндерге, ата-аналарға, ән-саз пәні ұстаздарына таптырмайтын бұл жинақ арқылы бесік жырларынан бастап бүгінгі күнге дейінгі аралықтағы талай тамаша әндермен танысуға мүмкіндік бар. Жаңа кітапта сондай-ақ Нұрғали Нүсіпжановтың ұлттық дәстүрлерімізге кең түсінік берген шағын ойтолғамы берілген. Жинақта бас-аяғы жүзге жуық ән топтастырылған. Олардың басым көпшілігін қазақтың қабырғалы ақындары мен көрнекті композиторлары жазған. Қосымша мәліметтерді «Өлке» баспасы редакциясына (тел: 2760913) хабарласып алуға болады.
