Азаматтық соғыс деген — созылмалы дерт
Қазір көптеген елдерде азаматтық соғыстар көрініс беріп жатыр. Мұндай қақтығыстардың әдетке айналуы жиі кездесе ме?
Нұрлан ТЕМІРБЕКОВ, Қызылорда
Өткен аптада ғана Бүкіләлемдік банк әлемдегі шиеленісті аймақтар жайында «Әлемдік даму – 2011» тақырыбындағы баяндамасын ұсынған болатын. Аталған жұмыстың деректеріне сүйенсек, соңғы 10 жылда орын алған азаматтық соғыстардың 90 пайызы бұған дейінгі 30 жылдық тарихта саяси төңкерісті бастан кешірген елдерге тән. Демек, азаматтық соғыстың созылмалы дертке айналу мүмкіндігі өте жоғары.
Қазіргі кезде әлемде 1,5 миллиард халық қарулы қақтығыс орын алып жатқан елдерде өмір сүруде. Ал шаңырағынан қашып шығып босқын атанғандардың есебі 42 миллион адамға жуықтайды. Саяси қақтығыстарды бастан өткеріп жатқан елдердегі кедейліктің деңгейі өзге елдермен салыстырғанда 20 пайызға артық.
