@ символы «айқұлақ» деп аталады

Электронды поштадағы @ белгісі нені білдіреді? Неге бұл белгі «собачка» деп аталады?
Жазира Мұхтарқызы, Шығыс Қазақстан облысы
Өте қызық сұрақ. Иә, интернетті күнделікті қолданатын кез келген адам күніне бірнеше мәрте @ белгісін теруі мүмкін, бірақ көпшілік бұл белгінің мәнін, қызметін ұға бермейді. @ – интернеттің ерекше символы. Кейінгі жылдары атал­ған белгінің кең қолданыла бастағаны соншалық, ол 2004 жылы Морзе әліпбиіне ресми түрде енгізілді. Сонымен, @ қайдан шықты дегенге келер болсақ, ең алғаш бұл белгі ортағасырлық жазбаларда қол­данылған екен. Ортағасырлық Еуропа­ның монахтары оны орыс тіліндегі «на», «в» деген шылаулардың орнына пайдаланған. Ал Испания мен Францияда «арроба» деп аталатын салмақ өлшем бірлігі осы белгімен белгіленген. @ символының қазіргі ресми атауы – «at». Ал @ белгісін әркімнің эл­ек­­тронды поштасына қолдануды «e-mail»-­ды қалыптастырушылардың бірі Томилсон ойлап тапқан. Ол компьютердің пернетақтасынан ешкімнің есімінде кез­деспейтін белгіні іздеген кезде осы сим­волға тоқталыпты. Сөйтіп, интернетті қол­данушының аты мен пошта мекен-жайындағы домен атауын бөліп тұратын белгі ретінде @ таңдалып алынған. Бір қызығы, бұл белгі әр елде әртүрлі жану­ар­дың атымен аталады. @ Ресейде – «күшік», Италияда – «ұлу», Дания мен Норвегияда – «піл», Америкада – «мысық», Болгария, Германия және Поль­шада – «маймыл», Чехияда «маринад астындағы сельд» делінсе, Сер­бия мен Вьетнамда – «дөңгеленген А», ал жапондықтар бас­қалардан ерекшеленіп, мұны «иірім» деп атайды. Бұл белгінің қазақшасын біздер «айқұлақ» деп жүрміз.