Апта күндерін қай тілде атап жүрміз?

Бүгінде апта күндерін біз қай халықтан енген атаумен атап жүрміз? Төл тілімізде әр күннің байырғы кезден қалыптасқан аты бар ма?
Болат Нұрғазы, Қарағанды қаласы
Қазіргі қазақ тілінде қолданылып келе жатқан аптаның алты күнінің атауы парсы тілінен енген. Әр күннің соңындағы «сенбі» парсының «күн» де­генді білдіретін «шамбэ» сөзінен шыққан. Осылардың ішінде қай күннің атауы парсынікі еместігін біліп тұрған шығарсыз. Әрине, мұсыл­ман үшін қасиетті жұма атауы арабтан енген. Мағынасы «жиналу, басқосу» дегенді біл­діреді.
Қыпшақтардың «Кодекс Куманикус» кіта­бында қыпшақ тіліндегі апта күндерінің атаулары былай деп келеді: сабат күні – сенбі, йекшанбе – жексенбі, тушанбе – дүйсенбі, сешанбе – сей­сенбі, чаршанбе – сәрсенбі, паншанбе – бейсенбі, айна – жұма.
Байқасаңыздар, қыпшақтар аптаның ең соңғы күні – жұманы «айна» деп атаған. Қазір сол тү­бірді тек түрікмендер ғана сақтап, жұма күнін «анна» деп атайды. Төл қазақшада апта күндері бүгін – бірінші күн; ертең – екінші күн; бүрсігүні – үшінші күн; арғы күні – төртінші күн; ауыр күн – бесінші күн; соңғы күн – алтыншы күн; азына – же­тінші күн.