Алты ай жұмыс істеген мұғалімге еңбек демалысы беріле ме?

Осы жылдың ақпан айынан мектепке мұғалім болып жұмысқа тұрдым. Бұған дейін еңбек өтілім болған жоқ. Осы орайда менің білгім келгені, маған осы жазда ең­бек демалысы беріле ме? Сонымен қатар сауықтыру жәрдемақысы толық төлене ме?
Жансая, Алматы облысы
Еңбекті нормалау және еңбекке ақы төлеу басқармасының сарапшы маманының мәлі­ме­тінше, ҚР Еңбек кодексінің 105-бабына сәйкес, қызметкерге жұмыс iстеген бiрiншi және келесi жылдары үшiн жыл сайынғы ақылы еңбек демалысы тараптардың келiсiмi бойынша жұмыс жылының кез келген уақы­тында берi­ледi. Сонымен бірге кодекстің 107- бабы бойын­ша қызметкерлерге жыл сайынғы ақылы еңбек демалысын берудiң кезектiлiгi еңбек шартында, ұжымдық шартта, жұмыс берушi қызметкерлердiң пiкiрiн ес­ке­ре отырып бекi­тетiн демалыс кестесiнде бел­гi­ленедi. Демалыс кестелерi өндiрiстiк қажет­тi­лiкке байланысты өзгертiлген жағдайда жұмыс берушi бұл туралы қызметкерге еңбек демалысы басталардан кемiнде екi апта бұрын хабарлауға мiндеттi.
Кодекстің 104-бабына сәйкес, жыл сайын­ғы ақылы еңбек демалысына құқық бере­тiн жұмыс өтіліне:
1) нақты жұмыс iстелген уақыт; 2) қыз­мет­кер нақты жұмыс iстемеген, бiрақ оның жұмыс орны (лауазымы) мен жалақысы толық немесе iшiнара сақталған уақыт; 3) қыз­меткер еңбекке уақытша жарам­сыз­ды­ғына, оның iшiнде жүктiлiгiне және босануына орай демалыста болған уақытына байланысты нақты жұмыс iстемеген уақыт; 4) қызметкер жұмысына қайта алыну алдында нақты жұмыс iстемеген уақыт қосылады.
Кодекстің 239-бабына сәйкес, мемлекеттiк бюджет есебiнен ұсталатын азаматтық қыз­мет­шi­лерге лауазымдық жалақысы мөл­ше­рiнде сауықтыруға арналған жәрдемақы төленеді. Азаматтық қызметшiлерге сауық­ты­ру­ға арнал­ған жәрдемақы күнтiзбелiк жылда бiр рет төле­недi.
Бұл ретте, cізге сауықтыруға арналған жәрдемақы толық төленуі тиіс.