Алапестен қалай құтылуға болады?

Соңғы жылдары менің ағамның денесін ақтаңдақ, яғни алапес басып барады. Ол неден шығады, одан құтылудың жолы бар ма?
Бексұлтан Әлімбетов, Оңтүстік Қазақстан облысы
Бұл сұраққа Алматы мемлекеттік дәрігер­лер білімін жетілдіру институты Тері-венеро­логия кафедрасының меңгерушісі, медици­на ғылымының докторы, профессор Гүлсім АСҚАРОВА жауап береді:
– Алапестен құтылудың жолы жоқ емес, бар. Бірақ оған ұзақ уақыт ем қабылдау қа­жет. Оны емдейтін заманауи үлгідегі қон­дыр­ғы ОҚО тері-венерология диспансе­рінде бар. Әзірге бұл – Қазақстан бойынша жалғыз қондырғы. Оның қазіргі нәтижесі жаман емес. Мен сізге айтайын, адамның ішкі органдары дұрыс жұмыс істемей, тері таза болмайды. Мәселен, біреудің денесінде дақ пайда болса, оны біз түбегейлі зерт­тей­міз. Ондай жағдайда міндетті түрде асқазан, ішек, ұлтабар, өт, бауырын тексеруге тера­певт­ке жібереміз. Аурудың ішкі себебін тап­пай жатып дақты кетіру мүмкін емес. Сон­дық­тан оның ішкі себебін анықтап, кешенді түрде ем жүргізуіміз қажет. Бірақ кейде кей­бір науқастар бізді дұрыс түсінбей, «менің ішкі құрылысым ауырып тұрған жоқ, терім­дегі ауруды жазып бер» деп аттандап тұрып алады. Алайда ішкі құрылыс дұрыс жұмыс істемей, емнің шипалы болуы екіталай. Сондай-ақ әрбір науқас бұл жазылмайтын ауру деп пессимизмге салына бермей, мен осыдан жазылып шығамын деп іштей сеніп, барынша талпынатын болса, ол міндетті түрде ауруынан айығады.