Айбергенов ән байқауының шарты қандай?
Елімізде қазақтың көрнекті ақыны Төлеген Айбергенов шығармашылығына арналған «Бір тойым бар» деп аталатын ән байқауы өткізілмек екен. Осы ән байқауының талап-шарттары қандай?
Бексұлтан Орынтай, Қызылорда облысы
Сазгерлер арасындағы бұл байқау Т.Айбергенов өлеңдеріне жазылған әндер мен ақынға арнап жазылған арнау әндер аталымдары бойынша өткізіледі. Ән байқауына кәсіпқой және әуесқой сазгерлер қатыса алады. Олардың жас мөлшері шектелмейді. Ұсынылатын әндер бұрын-соңды орындалмаған және жарияланбаған жаңа шығарма болуы тиіс. Әндер кез келген жанрда қабылданады. Авторлар екі аталымға да бір немесе бірнеше шығарма жіберуіне болады. Үміткер өз туындысын CD + (дауыспен), CD – (дауыссыз) жазылған түрін, бұған қоса екі дана әннің нотасын, екі дана мәтінін (басылымын көрсетіп) 15 тамызға дейін «Айбергенов әлемі» журналының редакциясына жолдауы керек. Жеңімпаз атанған шығармалардың орындаушылары туындыларын Т.Айбергеновтің 75 жылдығына арналған «Бір тойым бар» деген шарада орындайды.
Онда бірінші аталым бойынша бас жүлдеге – 500 мың, бірінші орынға – 300 мың, екінші орынға – 200 мың, үшінші орынға – 100 мың теңге. Екінші аталым бойынша бірінші орынға – 300 мың, екінші орынға – 200 мың, үшінші орынға 100 мың теңге жүлде тағайындалып отыр.
Ұйымдастырушылар сондай-ақ Т.Айбергенов өлеңдерін мәнерлеп оқу бойынша да мектеп оқушылары арасында байқау жариялап отыр. Онда бірінші орынға – ноутбук, екінші орынға – теледидар, үшінші орынға – ұялы телефон және ынталандыру жүлдесіне DVD, MP3-player, флешка тағы басқа сыйлықтар берілмек.
