Өмірде біз аңғара бермейтін, сырына тереңірек үңілмейтін тылсым жайлар өте көп. Таяуда осындай бір өзгеше жағдай жөнінде Түркістан облысындағы Қазығұрт ауданының тұрғыны Нұриддин Құралдан естіген едік. Оның аты Нұржан болған екен, бертінде есімін өзгертіпті. Біз Нұриддинге өзімізді қызықтырған сұрақтарды қойдық.
&ndash Нұреке, есіміңізді бұлайша өзгертуіңізге не себеп болды?
&ndash Мен Қазығұрт ауданының Сабыр Рақымов ауыл округіне қарасты Көкібел ауылында туып-өскенмін. Отбасында екі ұл, үш қыз өстік. Ағам Нұрланның атбайлары болсын деп менің есімімді Нұржан қойыпты.
Менің сәби кезімде отбасымыз сол кездегі «Коммунизм» совхозының Абай бөлімшесіне көшіпті, әкем сондағы мектепте директор болған. Абай ауылындағы біздің үйдің төменгі жағында шағын бау болушы еді, сол жерге барып ойнайтынбыз. Төрт-бес жасар кезімде болар, ойнап жүргенде өз-өзімнен «Нұржан деген ат маған қазір бола береді, ал үлкейгенде жараспайды ғой» деп ойлайтынмын, үлкейгенде не болады деп кәдімгідей қинала ойлаушы едім. Өйткені «жан» деген қосымша жалғау балаға қарай еркелетіп айтылады ғой, маған ол үлкендерге мүлде жараспайтын сияқты болып көрінетін. Осының соңы ақырында есімімді өзгертуге жеткізді. Атымды бертінде өзгерттім.
&ndash Қызық жай екен. Адам есейе келе балалық ойлардың көбі ұмытылып кетеді ғой негізі&hellip
&ndash Ол рас. Мен де кейін, есейе келе бұл жай есімнен шығып, ұмытып кеткенмін. Бірақ жасым 30-дан аса өзгелердің өзімді Нұржан деп атауы тағы да «құлынтай» деп еркелеткен сияқты естіліп, ыңғайсыз әсер ете бастады. Қазақ «жан» деген сөзді баланың атына қосып, еркелетіп айтып жатады ғой. Маған өзімнің атым сол сияқты, біртүрлі әсер етеді. Мысалы, орыстарда Владимирді бала кезінде Володя дейді, есейгесін олай атамайды емес пе? Осының бәрін ойлаймын, ішімнен өзімді-өзім жеп, тіпті мазасызданамын. Мұндайға көңіл бөлмесе аса әсері болмайтын да шығар, ал менің ойымнан ол мүлде шықпайтын болды. Содан біртүрлі, мазасызданып, ауырып жүрдім.
Пайғамбарымызға 40 жасынан Құран аяттары түсе бастаған, сондықтан 40-ты «Пайғамбар жасы» деп те жатады ғой. Мен жасым 40-қа толғасын қайтадан ауырдым, оның соңы Шымкенттегі жүйке аурулары ауруханасына түсуіме апарып соқты. «Шизофренияның өткір түрі» деген диагноз қойылды. Есім орнында, 100 пайыз ақыл-есім бүтін, бірақ жиі еліріп, өзімді соншалықты мықты сезініп кететінмін. Ақша жетеді, не істеймін десем де істеймін, тіпті шектен шығып кеткен едім.
Қатты ауырып жүргенімде маған жүйке аурулары ауруханасына көрінсейші дегендер болған. Бірақ мен оған құлақ аспағанмын. Өйткені ақыл-есім орнында ғой, әкетіп бара жатқан жындылық жоқ. Әрекеттерімнің дұрыс емес екенін өзім де білетінмін, бірақ бұйырып тұрғаны осы ғой деп істей беретінмін. Оны айналамда жүргендер білді, басқа көп адамдар білген жоқ, көрмейтін. Содан кейін мені Шымкенттегі жүйке аурулары ауруханасына аяқ-қолымды байлап апарған еді. Мен қазір сол кезде ауруханаға түскеніме іштей ризамын.
Ол аурухана түрме сияқты, барғасын адам өз-өзіне келгендей болады. Жүйкесі шаршаған, соққы алған, аварияға ұрынған сияқты түрлі жолдармен түскен адамдар бар. «Шекаралық бөлім» дегені бар екен, мен сонда жаттым.
Адамның іс-әрекетінің 70 пайыздан астамы дұрыс болмаса, ол біртіндеп жынданады екен, бұл туралы сол жерде жатқанда естіп білдім. Негізі ол жерде емделушілердің 90 пайыздайының ақыл-есі қалыпта, тек емделуі, жүйке шаршауынан тынығуы керек деп жатқызылғандар болды.
&ndash Жалпы, ат өзгеру жөніндегі ойыңызды үлкендерге, жөн білетін адамдарға айтқан кезіңіз болған ба еді? Олар не деді?
&ndash Сол кездері атымды Лұқпан немесе Махмұт деп, тағы басқалай аттарды ойластырып, есімімді өзгерткім келген. Атымды өзгерту туралы ой келе береді, алайда оның түпкі себебін білмеймін, түсінбеймін. Бірақ солай болуы тиіс сияқты, оны іштей, түйсігіммен сеземін.
Кейін жұма намазына барып тұратын болдым. Бірде ұстаздан: «Алланың 99 есімі бар, солардың бірнешеуін адамға жеке дара қоюға болмайды, олай етсе адамға ауыр тиеді», &ndash дегенді естідім. «Нұр» деген Алланың бір есімі, ал «жан» деген бізде еркелетіп айтылатын сөз, ол түсіп қалғанда «Нұр» деген қалып кетеді ғой. Өзімді Құдайдай сезініп, айтқаным бола беріп, дандайсып кеткенмін-ау деген ой келді.
Біздің ауылда көнеден келе жатқан мешіт жұмыс істейді, сонда Мұхиддинхан деген ишан, имам ата бар. Бабаларынан бері 400 жыл болыпты, осы дін жолында қызмет етеді. Сол атаға: «Есімімді ауыстырғым келеді», &ndash деп айттым. Ол кісілер өте сезімтал келеді ғой: «Есімің жақсы ғой, өзгертіп неғыласың?» &ndash деді. «Солай болуы керек деп есептеймін, есімімді ауыстыруым керек», &ndash дедім мен. Ол кісі мені ниеті толған ба деп тексеріп көрген сияқты. «Онда мен бұл жайында үлкен ұстаздан сұрап көрейін», &ndash деді.
Содан арада бір айдай уақыт өткесін Мұхиддинхан ата бұл жағдай туралы үлкен ұстаздан сұрағанын, ол кісінің: «Егер есімін өзгерткісі келсе, Нұриддин деп өзгерткені абзал», &ndash деп айтқанын жеткізді.
«Дін» деген &ndash тура жол ғой, «Нұриддин» деген «Алланың тура жолын көрсетуші», «Тура жолды тірілтуші» деген мағына береді екен. Мұхиддинхан ата: «Бұған байланысты құжаттағы атты өзгерту шарт емес, жұрт Нұриддин деп атаса, сол жеткілікті», &ndash деді.
&ndash Сонымен атыңызды өзгерттіңіз бе? Жаңа есім өміріңізге қандай жаңалық әкелді?
&ndash Содан ағайын-туыс, жора-жолдастарға мені енді Нұриддин деп атаңдар десем, ешқайсысы көнбейді. «Айналайындар, мен қатты ауырдым. Есімімді өзгерту керегі айтылды. Мені енді Нұриддин деп атаңдар, сонда маған жақсы болады», &ndash десем, бұған олар бас ауыртпайды, «Үйреніп қалғанбыз, Нұржан деп атай береміз», &ndash дейді.
Мені бұрынғыша бәрі де «Нұржан», «Нұреке», «Нұржан аға» деп атап жүрді. Бірде жұмыста ең жақын көретін бір жасы кіші жігіт: «Нұреке, Нұржан аға&hellip» &ndash дей беріп еді: «Е, айналайын, маған жамандық тілейтін болсаң, мені осылай атай бер», &ndash дедім. Ол қатты ыңғайсызданды, содан кейін: «Өткенде маған қатты айттыңыз», &ndash деп, мені «Нұриддин аға» деп атап кетті. Бірақ басқалар бұрынғыдай «Нұржан аға», «Нұреке» деп жүрді.
Осылай уақыт өте берді. Бірде, 2012 жылы Шымкентте «Ордабасы» мен «Шахтер» командаларының кездесуі болып, футбол матчын тамашалауға бардық. Сонда «Ордабасы» үсті-үстіне шабуыл жасайды, бірақ нәтиже жоқ, ал «Шахтер» өзінің қорғанысын мықтап реттеп алды. «Ордабасының» ойыншылары шабуылдап, «Шахтердің» қақпасына жақындағанымен ештеңе де өндіре алмайды, қорғаушылар оларды тырп еткізбейді, қақпаға қарай тіпті де өткізбейді, мүмкіндік тие салысымен өздері қарымта шабуылға шығады. Тура бір шахматтағыдай тәртіппен ойнағанды тұңғыш рет көріп, таңқалдым.
Содан екінші тайм арасындағы үзіліс кезінде алаң шетінде садақ көтеріп бара жатқандар көзіме шалынды. Мына жерде садақ ату спорты бар екен, қатысып көрсем қалай болады деген ой келді. Сосын алаңды айналып өттім де, жандарына барып, сөйлестім, «Қатысуға бола ма?» &ndash деп сұрадым. «Қатысуға болады, алдымен садақты қалай тартуды үйретеміз», &ndash деді. Содан келісіп, садақ атуға қатысатын болдым.
Ол жерде садақ ату спортымен негізінен жастар айналысады екен. Ешқайсысын танымаймын. Атымды Нұриддин деп айтып таныстым. Кейін бәрі мені Нұриддин аға деп кетті. Сөйтіп мені жаңа атыммен атайтын адамдардың салмағы арта бастады. Бұл маған өте жайлы, аса жағымды әсер етті, жаным рахаттанып, сауыға бастадым.
Содан бірде садақ атудан жарысқа бардық. Жарысқа қатысушылардың аты-жөнін төлқұжатта жазылуы бойынша хабарлап жатты. Маған келгенде: «Нұржан Құрал» деп еді, жанымдағылар паспорттағы атымды естігенде түкке де түсінбей, қатты таңқалды. «Нұржан деген кім?» &ndash дейді. «Мен ғой», &ndash десем, ауыздары ашыла таңырқайды. Құжат бойынша солай екенін айтқанымда: «А-а&hellip» &ndash десіп қалды. Бұл маған тіпті де жайсыз тиді, тура бір өтірік айтып, әшкере болып қалған адамдай қолайсыз күйге түстім.
Содан кейін атымды барлық құжаттарға өзгертіп жазғыздым. Біреу Нұржан десе, құжатымды көрсетем, атымның Нұриддин болғанын дәлелдеймін. Жұрттың көбі енді жаңа атыммен Нұриддин деп атайтын болды. Қазір, Құдайға шүкір, есімім де реттелді, өмірім де ретке келіп жатыр, бәрі де қалыпқа келді.
&ndash Негізі ел арасында Нұржан есімді адамдар көп қой. Бұған байланысты не айтар едіңіз?
&ndash Жалпы, өзіме қатысты бұл оқиғаны, бастан өткен жайларды көпшілікке айта жүруді өзімнің міндетім деп санаймын, көпшілік бас қосқан жерлерде реті келсе, айтып жүремін. «Нұржан деген атты есейе келе өзгертпесе адам еркелеп жүре береді, еркелеп, дандайсып кетеді, шектен шығып кетуі де мүмкін», &ndash деймін. Ерке адам өзіне жауапкершілік ала бермейді ғой.
Нұржан есімділерді өзімше зерттеп жүрем. Біздің ауылда Нұржан Тасбалтаев деген жасы 70-тен асқан аға бар, ауылдағы ең бетке ұстар азаматтардың бірі. Өзі келбетті, білімді, дарынды кісі. Бірде кездесіп қалғанымызда жағдай сұрады. «Аға, мен атымды өзгерттім. Әйтпесе жағдай қиындап кетеді екен», &ndash деп едім, күліп: «Мен де Нұржанмын. Жасым 70-ке келді. Менде бәрі де ойдағыдай ғой», &ndash деді. «Аға, егер уақытында мән бергенде, есіміңізді реттегенде қазір сіз Парламентте отыратын ағаларымыздың бірі болар едіңіз», &ndash дедім ол кісіге. Негізі адам өзінің ішкі қуатын сезеді ғой. Нұржан аға: «Әй, мынауың шындыққа жанасады екен», &ndash деп менің айтқандарыммен келіскендей болды.
Ауылда Нұржан есімді тағы да екі-үш ағаларымыз бар, жастары 80-нен асса да ширақ, жеңіл әзіл айтып жүреді, ақсақалдық міндеттерін атқару әзірге ойларына келмейтін сияқты.
Бірде сөзден сөз шығып, бір жігітке: «Нұржан дегендер осындай болады, есейе келе атын өзгертпесе еркелеп жүре береді, кейде шектен шығып кетуі мүмкін», &ndash деп едім, ол бұған сенбей, бос сөзге шығарды. «Нұржан деген облыстық деңгейдегі бастығымыз бар, оған өзінің атынан келіп жатқан зиян жоқ», &ndash деді. Бірақ Нұржан есімді сол кісі арада біраз уақыт өткен соң болмайтын жерден үлкен келеңсіздікке ұрынды. Басында сенбеген адам кейін менің айтқандарыма сенгендей болыпты.
&ndash Сіздің туған ағаңыздың аты &ndash Нұрлан. Бұл есімге байланысты да аңғарғандарыңыз бар шығар?
&ndash Менің Нұрлан деген атқа байланысты да ойым осындай. «Ланг» деген «ақсақ» дегенді білдіреді ғой. Мысалы, мықты ел билеуші Ақсақ Темір &ndash Темірлан ақсақ болған. Нұрлан дегендердің не өзінде, не отбасында, тағы да басқа, әйтеуір бір жағынан ақсайтыны болатын сияқты.
Нұрлан ағамда, отбасында бүгінде сондай жайлар болып, көп істері ақсап жатыр. Бұрын астықпен айналысқан, кейін жерлерін өткізді, қазір бау-бақшамен айналысуда. Мен сияқты емес, ұстамды, сабырлы болғанымен, оның өмірінде де тылсым жайлар кездесуде. Осыны өзіне айтқанмын, түсінгенгендей, бірақ мен сияқты шешімге келуге әлі пісе қойған жоқ-ау деймін.
&ndash Тағы да қандай аттарға байланысты ойларыңыз бар?
&ndash Менің Сабыр деген ұлым бар, мінезі өркөкіректеу. «Сабыр» деген де Алланың бір есімі ғой. Мұндай атты жеке қою ауырлық ететінін ойлап, атын Әбдусабыр деп немесе Сабырхан, Сабырбек дегендей өзгерту ойыма келеді.
Мұхтар деген жиенім бар. «Мұхтар» деген ат «Ешкімге тәуелді емес, дербес» дегенді білдіреді екен. Ал негізі Алла ғана ешкімге тәуелді емес, біз, адамдар Аллаға тәуелдіміз ғой. Сондықтан оның атын, мысалы, Мұхтархан деген дұрыс болар еді.
Жалпы, мен өзім еліміздегі діни орталық адамдары Алланың қай есімін адамға жеке қоюға болмайтыны жөнінде пәтуа берсе дұрыс болар еді деп ойлаймын. Маған бәрін болмаса да біразын жеке қоюға болмайды деп түсіндірген, ондай есімдерге жалғау болуы керегін айтқан. Мысалы, Рахманды Әбдірахман деген сияқты.
Қазақта құрамында «Нұр» сөзі бар есімдер көп қой, Нұрбақыт, Нұрислам, тағы басқа. Олай ат қоюға бола береді, өйткені онда «Нұр» сөзі жеке тұрған жоқ.
Бірде ұстазбен Алматы жаққа барғанмын, сонда көп әңгімелестік. Біз көп нәрсені біле бермейді екенбіз, мән бермейміз. Мысалы, «нұр» дегенді күннің сәулесі деп түсінеміз. Шындығында күннің сәулесі түнде айға түсіп, шағылысып, содан жерге түскен жарығын «нұр» дейді екен. Яғни «нұр» деген &ndash айдың сәулесі. Жерге жарық көзінен тікелей түскен сәуле нұр делінбейді екен. Кейде адамды «нұрланып кетті» деп жатады. Ғалымдардың айтуынша, өзі ғалым болмағанымен ғалымдардың айтуымен жүрген, ғылымды сүйген адам нұрланып жүреді екен. Адамдар осы жағын да білуі керек.
Осындайларды түсіне келе мен, ең бастысы, адамдарға пайда әкелетін нәрсенің бәрін нұр деп есептедім. Кейде малдың қиын да «малдың нұры» деп жатады екен. Себебі ол адамдарға өзіндік пайдасын тигізеді ғой. Адамдар құран оқып та нұрланады деп жатамыз.
Жалпы, адам не нәрсеге терең мән берсе, содан әсер алады. Мысалы, маған қатты әсер еткен нәрсе өзгеге онша әсер етпеуі мүмкін. Мәселен, Нұржан деген азаматтардың көбі өз атына тым қатты мән бермейді. Ал менде өз атың өзіңе сыр білдіріп тұрады деген түсінік бар. Есім адам тағдырына әсер етеді. Есімің жақсы болса, көңіл тоқ. Дінімізде де балаға жақсы есім берілуі керек деп айтылады. Әкенің отбасына қатысты үш міндеті бар, соның бірі &ndash балаға дұрыс есім қою. Мұхаммед пайғамбарымыздың: «Үш ұлы бар отбасында бір балаға менің есімдерімнің бірі қойылса, ол үйде бәрі де жеткілікті болады. Ондай ат қоймаса, ол надандықтың, білімсіздіктің белгісі» деген сөзі бар екен.
Қазіргі отбасымда екі қыз, бір ұл бала бар. Біз ұлымыздың атын Ділмұхаммед деп қойғанбыз. Адамға көбіне көңіл жетіспей жатады ғой. Ал бізде қазір, Құдайға шүкір, бәрі де жеткілікті.
&ndash Сіздің қанша әйеліңіз бар? Олардан қанша балаңыз бар?
&ndash Мен үш мәрте үйленгенмін. Бірінші әйелден бес бала, екіншісінен &ndash бір, үшіншісінен үш бала бар. Алдыңғыларымен заңды түрде ажырасқанмын, тиісті мүлікпен қамтамасыз еткенмін, қазір де мүмкіндігінше қарасып тұрамын. Екі әйел балалармен бөлек тұрады. Біреуі астанада, екіншісі Шымкентте, үшіншісімен ауылдамын. Барлығымен де қарым-қатынасым жақсы, жақын араласып тұрамын.
&ndash Кезінде миллиондаған доллар байлығыңыз болыпты&hellip
&ndash Мен Алматыдағы физика-математика мектебін бітіргенмін. Қай нәрсеге болса да терең мән беріп, саралап-сараптау әдетімде бар. Айналамызда болып жатқан нәрсенің бәрі бізге сабақ қой негізі. Өткенде өзімді белгілі кәсіпкер Марғұлан Сейсенбаймен салыстырып көрдім, ол менен мың есе артық екен. Бір кездері онда 5 миллиард 500 миллион доллар қаржы болыпты. Ал менікі 2009 жылдары 5 миллион 800 мың долларға дейін жеткен еді. Жылына 1 миллион доллардай табыс келетін. Ағаммен бірге астық, ұн бизнесімен айналысатынбыз, қаржылық жағдайымыз жоғары болды. Қазір кәсібіміз бөлек.
Өткенде «Теңіз-Шевройлда» істейтін бір жігіттермен әңгімелесіп қалдым. Жұмыстарында 3500-5000 тоннаға дейін жүк көтеретін крандар болады екен. Мұндайға сену қиын, оны көзге елестетудің өзі қиын ғой. Осыны естіген кезде өзімді Марғұлан Сейсенбаймен салыстырып көрдім, оның көтеру күші менікінен мың есе жоғары екен деп ойлағаным содан.
&ndash Ал қазіргі қаржылық жағдайыңыз қалай?
&ndash Мынадай мысал айтайын: Кейде кептер астығы мол қамбаға тап болады ғой, сосын рахат болды деп басқаны ұмытып, алдындағыны жеп жүре береді. Сөйтіп жүріп семіреді де, ұша алмай қалып, мысыққа жем болады. Сол сияқты, кезінде табыс мол болғасын көп нәрсеге мән бермеппіз. Кейін ауырдым. Құдай өзі көп нәрсені реттейді екен. «Малым &ndash жанымның садақасы» дегендей, әйтеуір сол жиған ақша бүгінге дейін жан сақтады ғой.
Мен Давлатовтың сабағын тыңдап тұрамын. «Жоғалған нәрселер, ауыр жағдайлар бәрінен сабақ алып, нәтиже, қорытынды шығарсаң, өмірге пайдаланатын болсаң, кемінде 10-100 есе болып қайтады деген бар», &ndash деп айтады. Енді мен қаржымды 500 миллион 800 мың долларға жеткізсем деген жоспар құрып, соған кірісіп отырмын. Маған «Боржомидің» «Когда здоровье наполнено, история начинается заново и заново» деген жарнамасы ұнайды.
Адам қатты соққы алғанда одан сабақ алады. Негізі табыс мүмкіндіктермен, жақсылықтармен, жеңілдіктермен келсе жақсы, сонда бәрі беймарал, оңай болады.
&ndash Сіз дін мәселесіне де қатты ден қойған сияқтысыз. Солай ма?
&ndash Кезінде атеист болдық қой. «Мұсылман болу әсте-әсте» демекші, 2001 жылдан бері ақырындап дінге мойын бұра бастадым. Жаңа жүйке аурулары ауруханасында жатып шыққаным туралы айттым ғой. Он күн емделгенмін. Қатты ауырып жүрген кезімде бірде жанымнан екі адам әңгімелесіп өтіп бара жатып, біреуінің: «Ілімсіз тақуалық жындылыққа апарып соғады», &ndash дегенін естідім. Ол тура маған қарата айтылғандай әсер етті. Өйткені сол кездері мен қатты тақуа болып кеткен едім. Осы жағдай маған қатты әсер етіп, ойға қалдырды, сосын тақуалыққа тым берілуді тоқтаттым. Ақырындап ілім іздеуге кірістім.
Қазір біраз нәрсе білеміз. Өзім кейде ауылдағы мешітке барып, азан шақырып тұрамын. Азан шақыруды өзімнің бір міндетім деп есептеймін.
&ndash Үш мәрте үйленген адам ретінде көңілге тоқығандарыңыздан да айта кетсеңіз.
&ndash Ең басты айтқым келетіні &ndash неке заңы. Үйленгенде мүлікке байланысты 50-де 50-ге қол қоямыз ғой. Ол қарапайым халық үшін қалыпты нәрсе. Шариғатта әйелдің мүлкі, еркектің мүлкі деп бөлінеді. Еркектің міндеті &ndash отбасын қамтамасыз ету, ол әйелдің міндетіне жатпайды.
Негізі еркектер табысы көп болса, туыстарына қарасып жатады, ол жөнінде әйеліне айтпайды. Бірақ бұл ұрлық есептеледі, ол жүйкеге әсер етеді. Сондықтан не нәрсе болса да ашық, нақты істелуі керек. Жеткілікті қаржылық жағдайға жеткесін менің тапқаным мынау, сендерге мынау, қалай жарататыныңды өзің білесің деп айтуға болады. Негізі сөзді «еркек» дегеннен гөрі «ер-азамат» деп қолданған дұрыс сияқты. Жалпы, ер-азамат еркін өмір сүруі керек.
&ndash Қазіргі отбасылық жағдайыңыз қалай?
&ndash Құдайдың сыйы деп ойлаймын, жас иіс аңсадым ба, бірінші әйелмен өмір сүріп жүріп екіншісімен көңіл қостым. Барып, құда түсіп, әке-шешесінің алдынан өтіп үйленгенмін. Ол жақтан бір қызды болып оралдық. Бірінші әйелден үш қыз, бір ұл еді, ол 1999 жылдан кейін бала көтермей жүрген. Екінші әйелді әкелген жылы содан қызғанып, ол бала көтерді, өмірге ұл әкелді. Есімін Алдияр деп қойдық. Сол кезде жұрт менің екіншіге үйленгенімді қателік деп жүретін, ал мен мұны өзімнің қателігімнің жемісі болды деп есептеймін.
Алғашында бір қалада, араласпай тұрдық. Кейін жағдай қиындап, екінші әйел шаршадым дегесін онымен ажырастым. Бірінші әйелмен де ара суыды. Содан бір көрші жеңгей: «Әйел бала-шаға деп өмір сүре береді, еркекке қиын, ішіндегіні шығара алмай қиналады», &ndash дегесін ойландым. Өзім де қиын екенін іштей сеземін, үйлену керек деп шештім. Содан үшінші мәрте үйлендім. Қазір, Құдайға шүкір, үш баламыз бар, қалыпты өмір сүріп жатырмыз. Басқа әйел-балаларыммен қарым-қатынасым жақсы, барып-келіп, араласып тұрамын.
&ndash Балаларыңыздың есімдерін атай кетсек. Олардың үлкені қанша жаста, кішісі нешеде? Әйелдер арасында қызғанышқа байланысты қандай да бір жайлар болып тұрмай ма?
&ndash Балаларымның аттары: Қарлығаш, Сабыр, сосын Айман мен Шолпан &ndash егіз қыз, Алуа, Алдияр, Ділмұхаммед, Әдина, Ясмина. Алуа &ndash екінші әйелден туған қызым. Мен балалардың жасына қарай ретімен айтып отырмын. Қарлығаш 1994 жылғы, тұрмысқа шыққан, қазір оның бір қызы бар. Жалпы, алдыңғы екі әйелге, балаларға қажетін бөліп бергенмін. Бірінші әйелден туған балалардың бәрі мектепті бітірген, ең кішісі 8-сыныпта оқиды. Бұрынғы әйелдеріммен, балалардың барлығымен араласып тұрамын. Әйелдерде жеке мәселелерде алғашында қызғаныш болған, қазір ортақ істе қызғаныш жоқ.
&ndash Негізгі мамандығыңыз қандай? Қазір немен айналысудасыз?
&ndash Мен кезінде Мәскеудегі инженерлік-құрылыс институтына түскенмін, бірақ оны аяқтамай тастап кеттім. Кейін Мәскеудегі Үкімет жанындағы халық шаруашылығы академиясында оқыдым, одан тиісті диплом алғанмын. Қазір жеке кәсіппен айналысудамын, соңғы кездері жаңа бір бағытты қолға алып жатырмын.
&ndash Әңгімеңізге рахмет, алдағы істеріңізге сәттілік серік болсын!