Осыдан біраз бұрын, өкінішке орай 14 жасар қыз бала қайтыс болды. Өте ауыр жағдай. Жаназасына, жерлеуіне қатысқан адам қарасы көп болды. Әкесінің құрдастары болса керек, көбісі 30-40 жастағы ерлер. Бәрі шүберекке шым-шым "топырақ салды" да шеткерірек тұрды. Жақындары бастады да, күректерін жерге қойысты. Асықпай, біртіндеп ауысып салып жатырмыз. Сол кезде молда "Келіңдер, топырақ салыңдар! Аяқтың астында жатқан сауаптан алмайсыңдар ма? Әр салған топыраққа екі Ухуд тауындай сауап жазылады" - деді. Осы сәтте әрірек тұрған кісілер жақындай бастады. Топырақ салып жатқандардың арасында отты құммен сөндіргендей апыл-ғұпыл көміп жатқан біреуінің әрекеті тіпті ерсі көрінді. Қызын "тезірек көміп" жатқанын көру әкесіне де оңай болмаған шығар. Бірақ оның ескерту айтар хәлі бар ма? Мен, өлген адамды "таудай сауап алам" деген оймен емес, жай ғана марқұмға құрмет үшін-ақ көмген абзалырақ деп ойлаймын. Онсыз да қабырғасы қайысқан жұртты молданың бейіт басында сауаппен "қызықтыруын" миым қабылдамады. Адамды ақырғы сапарына асықпай-ақ, құрметпен шығарып салуға болады деп ойлаймын.
Жұртты молданың бейіт басында сауаппен "қызықтыруын" миым қабылдамады
Последние статьи автора