Латын қаріпі туралы айтысып-тартысып жүре берсек, әлі он жыл ойланатын сияқтымыз
Латын қарпі туралы айтайықшы. Баяғыда, студент кезімізде ескі қазақ газеттерін оқу үшін кітапханаға барамыз. Төте жазуды білмегендіктен, "Айқап", "Дала уәлаяты" газеттерін оригинал оқи алмадық. Одан берідегі латын қарпімен жазылған дүниенің бірін түсінсек, бірін ұқпай қалдық. Ал жаңадан ұсынылған алфавит тәп-тәуір секілді. Тек, мәселе "ң" әрпінде шығар. Бірақ оған да уақыт өте келе үйренерміз. Меніңше, алфавиттің осы нұсқасы дұрысырақ. Қабылдап, бастауыш сыныптарды оқытуға кірісу керек. Айтысып-тартысып жүре берсек, әлі он жыл ойланатын сияқтымыз ғой. Толғағы келген нәрсені дер кезінде шешіп тастамаса, ол мәселе келер ұрпаққа артылған сансыз ауыр мұрамыздың бірі болып қалып қояды. Алфавит мәселесін бүгін және біз шешіп тастауымыз керек. Ең болмаса осы міндетімізді орындайық!
Ал кирилл қарпімен жасалған орасан зор рухани құндылықтарымызды латын қарпіне ауыстырудың түк қиындығы жоқ. Баяғыдағыдай әріп қотарып отырмаймыз. Компьютерлік технология әп-сәтте мыңдаған кітапты латын қарпіне аудара салады. Қолымыздан дүние әлемді өзгерту келмесе де, болашақ ұрпағымызды бодандық санадан осылай арылту келері анық. Әрине, қазір бәрімізге қиын тиеді. Бірақ жақсы нәрсе, жақсы болашақ үшін ондай "шоковая терапия" аса қажет. Алфавиттің осы нұсқасын қолдайық!
Тоқтар Жақаш
Фейсбуктегі парақшасынан
