Адамның көзі мен құлағы тек қана жамандыққа елеңдеп қалғасын санасында да жамандық ұялайды
Бұрынырақта теледидардан жаңалықтарды қараушы едім, қазір қойдым. Анда атып кетті, мында зорлап кетті, дауыл жайпап кетті, сел алды, сəбиін дəретханаға тастап кетті, қысқасы - тұнған негатив. Төбе шашың тік тұрады! Мен сияқты эмоцияның адамына - тікелей жететін стресс. Отыр, содан кейін кеудеңді жара өрекпіген жүрегіңді қолыңа алып. Болмай бара жатса, валерианка мен пустырникті қосып ішіп ал:) Басқа қолыңнан не келеді?
Баяғыда əжем марқұм: "Қой құрсын, өзімен кетсін, бəлесінен аулақ! Тыңдама жаман сөзді!" деп, бір-бірінің шашына жармаса жұлысып жатқан екі əйелдің жанынан аулаққа сүйрей жөнелетін. Сөйтсек, құлағы мен көзі жамандыққа көндікпесін дейді екен ғой. Бала емеспіз бе? Бізге қызық керек. Қайсысы жеңер екен деп күтіп тұрамыз. Екі кештің арасында көрші əйелдің шəңкілдеген даусы шықса болды, елең ете қаламыз да, бірдеңеден құр қалғандай ентелеп жетіп барамыз. Əлгі ұрыстың эпизоды көпке дейін көз алдымызда көлбеңдеп тұрып алады. Ең жаманы - естіген кейбір сөздерді біреуге ренжи қалсаң айна қатесіз қайталап жібересің.
Айтпағым - жұртты күйзелткеннен басқа көк тиын пайдасы жоқ осындай жағымсыз хабарларды теледидардан несін көрсетеді екен деймін? Көрермендер де бала боп кеткендей. Жағымсыз ақпаратқа елең ете қаларын қайтерсің?
Адамның көзі мен құлағы тек қана жамандыққа елеңдеп қалғасын санасында да жамандық ұялайды. Санаға сіңген жағымсыз сезімнің жуғарақпанда қайта қояры қиын-ау!
Жаман ақпаратпен - көзін, жаман хабармен оразасын ашып, жүйкесі жұқарған елге "жақсы əрекетте болмайсыңдар" деп өкпе арту бекер шығар.
