Қазақстанда сұйытылған газдың жаңа шекті көтерме бағасы белгіленді
1 шілдеден бастап Қазақстанда сұйытылған газдың жаңа шекті көтерме бағасы күшіне енді, - деп хабарлайды Alashainasy.kz тілшісі Оrda.kz-ке сілтеме жасап.
Мұндай мәліметті ҚР Энергетика министрлігі таратты.
Ведомствоның мәлімдеуінше, белгіленген көтерме бағаның 33 600 теңге/тонна шегінде (ҚҚС-сыз) сұйытылған мұнай газын өндіру құны зауытқа байланысты тоннасы 42-72 мың теңге болды.
«2022 жылы Қазақстанда сұйытылған мұнай газын өндіру 2021 жылмен салыстырғанда 400 мың тоннаға немесе 10%-ға қысқарды, бұл ретте тұтыну 400 мың тоннаға өсіп, 1,8 млн тоннаны құрады (2021 жылмен салыстырғанда 28%-ға өсті)» деп атап өтті Энергетика министрлігі.
Министрлік өндірістің құлдырауының басты себептерінің бірі инвестициялық тартымдылықтың жоқтығы деп түсіндірді. Өндіріс орындары сұйытылған мұнай газын өз құнынан төмен сатады.
Халықтың сұранысын өтеу және осы өнім өндірісін ынталандыру үшін Энергетика министрінің бұйрығымен өңдеуші кәсіпорындардан сұйытылған мұнай газының шекті көтерме бағасы ҚҚС есебінсіз 33 600 теңгеден тоннасы 40 320 теңгеге дейін көтерілді. Бұл ретте сұйытылған мұнай газының шекті бөлшек сауда бағасы өңірлерге байланысты литрі 4-6 теңгеге көтерілді.
