Ала сиырға алып ескерткіш орнатылды

Қостанай облысында биіктігі 5 метр, салмағы 800 келі сиыр пайда болды. Мұндай дәу сиырдан қанша сүт шығатынын ойлай беріңіз...
Әттең, металлопластиктен жаратылған сиыр сауыл­майтыны өкінішті. Есесіне, елді емізген түліктің құрметіне тұрғызылған ес­керт­кіш сәнді де салмақты шыққан. Ірі қа­раның арқасында табысқа кенелген ша­­руа қожалығы Зеңгі бабаға деген риза­шы­лығын осылай білдірген екен.
Денисов ауданындағы серіктестіктің жұ­мыскерлері сүті сусын, еті тамақ, терісі киім-кешек және төсеніш бо­латын төрт түліктің бірі – сиырға үнді халқындай сыйын­баса да, қатты құрмет тұ­та­тынын жа­рия етті. 90-жыл­дардағы қысылтаяң ке­зең­де жұрт жа­нын сақтау үшін малын сатып, туған жерінен үдере көш­кен­де, «Са­ры­ағаш» ЖШС осы ірі қараның күшімен, дәлірек айтсақ, сүтімен ша­руа­шы­лықты құтқарып қал­ған болатын. Сол өтпелі ке­зеңнің ауыртпалығын сиырдың ақ сүті­мен жеңіп шық­қан бақташылар мен сауын­шы­лар өздерінің алғысын метал­ло­плас­тик­тен құйылған еңгезердей ес­керт­кіш­пен ай­шықтады.
Өтеген Мұртазин, «Сарыағаш» ЖШС  ди­рек­то­ры:
– Қиын уақыттың өзінде де ферманы сақтап қалуға тырыстық. Қазір ер адам­дар­мен қатар әйелдер де тұрақты түрде жұмыс істейді. Қазіргі мақсатымыз – мал басын көбейтіп қана қоймай, әр сиыр­дан алынатын сүт мөлшерін де көбейту. Биылғы жылы 45 мың келі сүт алуды көздеп отырмыз, ал болашақта бұл көрсеткішті 55 мың­ға көтеруді жос­пар­лап қойдық.
Қостанай облысындағы алдыңғы қа­тар­лы шаруа қо­жалықтарының бірі болып табылатын «Сары­ағашта» қазір 1250 бас ірі қа­раға арналған жаңа фер­маның құрылысы қызу жүріп жатыр. Серік­тес­тік­тің символы ретінде сиырдың сұлбасын таңдап, ес­керт­кіш орнатқан «сарыағаштықтарға» деген Зең­­гі бабаның жомарттығы сарқылмаса, жі­герлі жо­ба­ла­рына сәйкес 2014 жылы сүт­тілерінің саны бес мың­ға жетіп қалуы да ға­жап емес.