Пианистердің VI халықаралық конкурсы өтеді
Алматыда пианистердің халықаралық конкурсы алтыншы рет өткелі отыр. Биыл байқаудың алғашқы жүлдесі – 20 мың доллар.
VI халықаралық конкурс қарашаның 15-23-і аралығында Құрманғазы атындағы Қазақ ұлттық консерваториясының Үлкен залында өтеді. Оған жеті елден 18 бен 32 жас аралығындағы өнерпаздар қатысады. Байқау үш кезеңнен тұрады: жеке орындау, камералық орындау және оркестрмен бірге шешуші нөмір. Сайыскерлерден Сергей Рахманинов, Фредерик Шопен, Ференц Лист, Йозеф Гайдн, Вольфганг Амадей Моцарт, Людвиг ван Бетховен, Франц Шуберт, Феликс Мендельсон, Иоганнес Брамс және басқа да әйгілі композиторлардың шығармаларын орындау талап етіледі. Жас пианиношылардың өнерін ҚР Халық әртісі, Құрманғазы атындағы Қазақ ұлттық консерваториясының ректоры Жәния Әубәкірова бастаған қазылар алқасы бағалайды. Қазылар құрамына АҚШ, Жапония, Германия елдерінен келген музыканттар да еніп отыр. Байқау сындарын консерваторияның ресми сайтынан онлайн тамашалауға болады. Жеңімпаздар қарашаның 23-і күні сағат 19:00-де анықталады. Ұйымдастыру комитеті үш жүлде мен үш арнайы диплом әзірлеп отыр. Бірінші жүлде – 20 мың доллар, екінші жүлде – 10 мың, үшінші жүлде – 5000 доллар. Арнайы дипломдардың сыйақысы – 1000 доллар.
