«Жаужүрек мың бала» мыңдаған баланың отаншылдық рухын оятуда

Астана қаласының «Жастар саясатын қолдау» мемлекеттік қоры Ш.Айманов атындағы «Қазақфильм» киностудиясының қолдауымен өзгелерге үлгі боларлық тамаша бір шараға мұрындық болып отыр. Кешеден бері «Жастар саясатын қолдау» мемлекеттік қоры кәмелеттік жасқа толмаған балалар үйі тәрбиеленушілерін, мүмкіндігі шектеулі, жетім, әлеуметтік жағынан аз қамтылған және көп балалы отбасыдан шыққан балаларды Астанадағы кинотеатрларға апарып, «Жаужүрек мың бала» фильмін тегін көрсетіп жатыр.
Тегін көрсетілім мамыр айының 18-19-ы және 21-23-і күндері болады екен. «Бар­лығы 3 мыңға жуық баланы қамтуды жос­парлап отырмыз», – дейді «Жастар сая­са­тын қолдау» мемлекеттік қоры дирек­то­рының орынбасары Бақытжан Жүніс­беков. 3 мың жасөспірім қазақтың жау­жүрек жұрт екенін сезініп, кешегі сүйекке сіңіп қалған құлдық санадан бір сілкінеді деген сөз.
Демек, өте құптарлық іс! Балаларды анау-мынау фильмге емес, дәл «Жаужүрек мың балаға» әкелгені қуантты. Мұндай шара республика көлемінде атқарылса, нұр үстіне нұр болатын еді. Қай қазақтың бол­сын рухын шыңдап, жігерлендіретін қазақ киноларының арасында бұл фильм­нің төбесі биік екені бірден байқалды. Жұрт мойындады. Алғашқы күндерінде-ақ кас­са­дан 1 млн доллар пайда тапқан қазақ­­тың қай фильмі бар еді?! Сұраныстың көбейгені – көптің көңілінен шыққаны. Жалпы, бұл фильмге мемлекеттік қыз­мет­кер­лерді міндеттеп апарса да, артық бол­майды. Қазақ кино өнерінің деңгейін кө­те­руге қосар үлесіміз де болар еді. Өкінішке қарай, бізде әлі де болсын ондай отан­шыл­дық сезім жетіспейді. Бұл жағынан Түр­кия­ның жұртынан үлгі алуға болады. Тұ­ты­на­тындары – отандық азық-түлік, отандық киім, көретіндері – отандық фильм. Себебі олар­­дың сана-сезіміне отаншылдық қасиеті жақсы сіңген.
Айтпақшы, мұндай шараны Назарбаев университеті де ұйымдастырғанын атап өт­песке болмайды. Университеттегі бірқа­тар ұстаздар қазақ студенттері мен өзге ұлт өкілдерінің оқушыларын фильмнің қазақ­ша көрсетіліміне алып барыпты. Бір күннің өзінде 110 студент барған, яғни бұл деге­німіз – 110 адамның жүрегіне отаншылдық, елдік, қазақы рухтың дәні себілді деген сөз. Одан кейін де барушылар саны толас­та­маған. Міне, бізге «Жаужүрек мың бала­дай» фильм керек және сол фильмнің ая­сын­да атқарылар осындай шаралар қа­жет.
Бақытжан ЖҮНІСБЕКОВ, Астана қала­сы­ның «Жастар саясатын қолдау» мемлекеттік қоры директорының орынбасары:
– Батыс өркениеті басым бол­ған бүгінгі жаһандану заманында ұлт­тық келбетімізді ашық айқындап, қазақ елі қанатын кеңге сермеуде иек артар өскелең ұрпақ пен жастарымызға бүгінгі Тәуелсіздіктің терең тамыр-тари­хынан сыр шертіп, отансүйгіштік тәлім-тәрбиені одан әрі күшейту қоғамның барлық саласының басты ұста­ным­да­рына айналуы тиіс. Себебі болашағы бүгіннен бастау алған жастарымыз бай тіліміз бен мәдениетімізге қанық, ұлт­тық рухы биік болуы керек. Ал «Жау­жү­рек мың бала» жобасы жастарымыз үшін рухани азық болумен қатар, олар­дың бойындағы патриотизмнің, мораль мен парасаттылық норма­ла­ры­ның, тәні мен жанының дамуы үшін тәр­­биелік мәні зор болып отыр.
Ернат ҚАШҚЫНОВ, Назарбаев универ­си­те­ті қазақ тілі кафедрасының кеңесшісі:
– «Жаужүрек мың бала» фильмі жас­та­рымыздың бойындағы отансүй­гіштік сезімді оятты. Осындай шебер туындының мамыр айында кинотеатрға жолдама алуы Назарбаев универ­си­те­тіндегі жеделдетілген қазақ тілі кур­сымен тұспа-тұс келді. Мамырдың 14-і күні қазақ тілі кафедрасының ұйым­дас­тыруымен осы курста оқып жатқан 110 студент «Азия парк» ойын-сауық орта­лы­ғына барып, фильмді қазақ тілінде тама­шалады. Киноны көрген жастар ерте­ңінде ой-пікірлерін, көрген-білген­дерін арнайы пікірталаста ортаға салды. Әрі тіл үйренуші жастар сезімдерін тек қана қазақша жеткізуге тырысты. Олар­дың фильмнен алған әсері керемет болды. Мәселен, Ерлан Кенешов деген студентіміз: «Қазақтарда ер жігіттің көзіне жас алуы ерсі болып есептелетіні белгілі. Бірақ «Мың баланы» көріп отыр­ған сәтте тебіреніп, екі көзім бірне­ше рет жасқа толғанын мойындаймын», – деп ағынан жарылды. Қазақтар туралы түсірілген тарихи фильм өзге ұлт өкіл­дерін де бейжай қалдырмаған. Сергей Бочаров: «Киноның сапасы өте жоғары. Актерлер шебер ойнады. Осы фильм арқылы қазақ халқын тани түстім», – деді. Фильмге барған сту­дент­тер алған әсерлерін басқа құрбы-құр­дастарына да айтып берген. Содан кейін де жастар кинотеатрларға ағыла бастады.
Аягөз, №61 мектеп мұғалімі:
– Меніңше, бұл – оқушыларымыз үшін өте жақсы іс-шара. Мүмкіндігі шек­­теулі, аз қамтылған, көп балалы отба­­сылардан шыққан балалардың мұндай фильм­дерді кинотеатрлардан тама­ша­ла­у­ға мүмкіндіктері бола бермейді. Біз бүгінгі көрсетілімге 39 бала әкеліп отыр­мыз. Барлығы да алдын ала естіп-білген­діктен, асқан қызығушылықпен келді. Бармаймын деген оқушы болма­ды.
Майра СЕМБАЙ, №61 мектептің 8 «б» сыны­бы оқушысы:
– «Жаужүрек мың бала» қазақ кино­ла­рының ішінде үздік шыққан фильм­дердің бірі деп есептеймін. Отанды сүюге үлгі көрсететін фильм. Мен осы­мен үшінші рет көріп отырмын бұл фильм­ді. Көрген сайын рухтанып қала­мын. Бір жалыққан емеспін. Ең бастысы, қазақ үшін бір жағадан – бас, бір жең­нен қол шыға­рар­лықтай бірлік қажет екен. Сонда ғана алынбайтын қамал, же­ңіл­­мей­тін жау жоқ. Мен осыны ұқ­тым.