Жақында бір топ ғалым Қазалы ауданында жатқан Жанкент шаһарының орнына зерттеу жүргізді. Осы шара барысында олар үлкен олжаға кезікті. Көне шаһардан құрымаған құмыраны тапты.
Құмыраның көлемі де үлкен. Ұзындығы бір метрге жуықтайды. Ернеуінің кеңдігі 60 сантиметрді шамалайды. Түбінің көлемі – 30 сантиметр. Ернеуінің жоғары жағында мөр тәрізді таңбалар байқалады.
Жанкент қаласының тарихы тым әріде жатыр. Көне шаһар ІХ-ХV ғасырларда өмір сүрген. Еуропа мен Азия арасын жалғаған Ұлы Жібек жолының бойында қоныс тепкен. Қалада ислам мәдениеті өркендеген. Ескі қала ғалымдардың қызығушылығын туғызып келеді. Алматы қаласындағы Әлкей Марғұлан атындағы археология институтының мамандары Жанкент қаласына жоспарлы түрде қазба жұмыстарын бастап кетті. Олар алғашқы жұмыс сәтінде осындай құнды қазынаға кезігіп отыр. Ғалымдар құмырамен бірге, өзге де қыштан құйылған дүниелерді тапты.
Дмитрий БОЯКИН, Әлкей Марғұлан атындағы археология институтының құжаттама және қайта жаңғырту бөлімінің директоры:
– Біз алғашқыда мұндай жетістікке жетеміз деп ойлаған жоқпыз. Қыш құмыра мен өзге де дүниелер бүгінгі ұрпақ үшін баға жетпес байлық саналады. Аталмыш жәдігерлерді тағы да зерттей түсеміз. Соның нәтижесінде Жанкент туралы көптеген дерек аламыз деп санаймын.
Жанкенттен көне құмыра табылды
Последние статьи автора