2001 жыл. Голливуд. Музыкалық орындаушылардың дүниежүзілік чемпионаты. Әлемнің 86 елінен үздіктер жарысқа түскен «аламан бәйгеде» қазақтың үкілеген тұлпары – «Ұлытау» желдей жүйткіген күйі шашасына шаң жуытпастан мәре сызығын бірінші болып кесті. Күтпеген жерден Гран-при мен Алтын медаль Қазақстанның қанжығасына байланғанда, алғашқы болып үйренген алпауыт елдердің ауыздары аңқиып «қазақ деген елден де осындай өнерпаздар шығады екен-ау!» деп таңғалды. Содан бері сегіз жылдың ішінде талай белестерді бағындырған «Ұлытау» енді Еуропа елдерін аралап концерт беруге бел шешті. Баспасөз күні қарсаңында баспасөз мәслихатын өткізген топтың «әкесі» Қыдырәлі Болманов осы жаңалықты жария етумен қатар, журналистердің мерекесіне тарту ретінде «Ұлытаудың» сапарға аттанар алдындағы соңғы концертін берді.
Ресми конференция емес емен-жарқын әңгімені жөн көрген Қыдырәлі Болмановқа жан-жақтан баспасөз өкілдерінің сұрақтары жауды.
– Сіздер таяуда «Ақжелең» күйіне клип түсірумен қатар, бір фильмге саундтрек жазды деп естідік. Осы жаңалықты тарқатып айтып берсеңіз...
– Ресей мен Қазақстан бірігіп түсірген бұл фильм «Прыжок Аффолины» деп аталады. Фильмге арнайы саундтрек жазуға бізге қолқа салды. Біз әрине қуана қабылдап, «Ақжелең» деп аталатын жаңа композиция жазып шығардық. Және жай жазып қана қомай бір оқпен екі қоян атуды көздеп, жаңа туындыға клип те түсіруді ұйғардық. Ол жұмыс бүгінде бітуге таяу. 15-20 пайыз жұмысы ғана қалды.
– Еуропаға нақты қандай да бір концерттерді көздеп бара жатырсыздар ма, әлде оны барған соң барып ұйымдастырасыздар ма?
– Осыған дейін бізді көптеген әлем елдері түрлі байқауларға және диск шығаруға өздері шақырып келсе, бұл жолы біз өзіміз тәуекелге бел буып, үлкен арман жетегінде аттанып барамыз. Ең әуелі шілденің 17-сі күні Франкфурт қаласында біздің дискіміздің тұсаукесері өтеді. Сондай-ақ 18-і Германияда үш күнге созылатын үлкен фестиваль болғалы жатыр. Біз сонда әлемнің көптеген елдерінен келген атышулы рок группалармен қатар бәсекеге түсеміз. Содан кейін шілденің соңына таман Испания мен Францияға аттанатын боламыз. Ал қалған күндері қарап жатпай өзіміздің жинағымызды сатудың маркетингтік жұмыстарымен айналысуды жоспарлап отырмыз.
– Сіздерге арнайы қаржы бөлінді ме? Қаржыландырушылар кімдер?
– Өз еңбегімізбен тірнектеп жинаған қаржымызға ғана сеніп кетіп барамыз. Демеуші де, продюсер де өзім. Қоржынымызда жеңіп алғанымыз бар, дискіден түскені бар бас-аяғы 400 мыңдай АҚШ доллары бар. Бұл біздің Еуропада жүріп-тұруымызға, сол жақтан менеджерлер жалдауға жететін шығар деген үміттеміз. Егер бізді қаржыландырамын деген ұлтжанды азаматтар болса, қуанамыз. Себебі бізді барған жағымызда нағашыларымыз күтіп отырған жоқ (күлді).
– Бас-аяғы оншақты жылдың ішінде Қазақстанды айдай әлемге танытқан «Ұлытаудың» әлі күнге бірде-бір атағы жоқ. Сіз қазір министрлікте отырсыз. Қолда барда қонышынан басып, осы топқа атақ әперуге болмай ма? Оған ешкім «неге бұлай етті?» деп наразы болмас еді, қайта қуанбаса...
– Ол атақ менің өзімде де жоқ. Жалпы, солай болғаны да дұрыс шығар? Себебі атақ қуып, соның соңында жүруге бізде тіпті уақыт та жоқ. Оның ешнәрсеге қажеті де жоқ. Атақтан өсіп, атақтан байып кеткен ешкім де жоқ. Біз оны алсақ та, алмасақ та әрқашан осы қалпымызда қаламыз.
– Сіздердің топта қазақтың ұлттық аспаптарынан тек домбыра ғана бар. Соның қатарына қобыз немесе басқадай да бір аспапты қосу жоспарда бар ма?
– Жоспарға енгізудің ешқандай қиындығы жоқ, тіпті бүгін-ақ қосуға болады. Бірақ ол үшін біз аяғымыздан тік тұрып, әлем тыңдайтын топқа айналуымыз шарт. Бір жағы Еуропаға да бүгінгі жаһан жұртшылығына қандай музыка керектігін байқап, тамырын басып көруге аттанып барамыз. Өйткені оларда өзгешелік өте көп. Бір ғана мысал бізде клип түсіріп, кез келген телеарнаға ақшасын төлесең, қалағаныңша айналдырып көрсетеді. Ал ол елдерде ақшамен ғана бір жетістікке жету деген мүмкін емес. Дейтұрғанмен сенің жасаған дүниеңді ұнатып, алатын болса, керісінше саған әр көрсеткен, радиотолқында әр айналдырған сайын өнер иесіне ақы төлейді. Еуропаның менеджменті мүлде бөлек, біз соны меңгеруге бара жатырмыз.
– Еуропаға турнелеріңізді қанша уақытқа жоспарлап отырсыздар?
– Қазіргі уақытта үш айға виза ашып берді. Негізі, 6 айға жоспарлағанбыз, бірақ бізді шетелде қалып қояды-ау деп қорықты ма, ондай уақытқа рұқсат бермей қойды. Дегенмен біз ары қарай жылдап қаламыз ба, жоқ жұмыстарымызды осы үш ай ішінде бітіріп қайтамыз ба, оны істің барысында байқап көреміз.
Түйін
Баспасөз өкілдерімен бір сағатқа жуық сөйлескеннен кейін журналистерге мерекелік дастарқан жайылып, «Ұлытау», Қарақат және Қыдырәлі Болмановтың өзі журналистердің құрметіне жанды дауыста концерт қойды. Жиналған қауым ұлт намысын ұлықтайды деген үкілі үмітпен «Ұлытауды» шығарып салды.