«Қазақстан» Қазмедиа орталығынан алғашқы хабарын таратты

2012 жылдың 24 желтоқсаны қазақ телевизиясы үшін тарихи күн болды. Еліміздің басты ақпарат көзі «Қазақстан» ұлттық арнасы Астанадағы Қазмедиа орталығынан хабар тарата бастады. Елбасы Н.Ә.Назарбаев тұсауын кескен Қазмедиа орталығы әлемдік жетекші өндірушілердің жаңа өнімдерімен жабдықталған. «Қазақстан» ұлттық арнасы ең соңғы және ең озық технологиялық құрал-жабдықтарын пайдалана отырып, айқындығы жоғары HD форматына көшті.
Алғашқы беташар хабарды «Таңшол­пан» бағдарламасы таратты. Эфирге бі­рін­ші болып шыққан тележүргізушілер Берік Көшербекұлы мен Назерке Нұртас «Қазақ­стан» ұлттық арнасының сандық форматқа көшіп, елорда төріндегі ме­диаорталықтан хабар тарата бастауына орай өз көрермен­дерінен сүйінші сұ­рады.
Елордадан таратылған «Таңшолпан» бағ­дарламасының алғашқы қонақтары ҚР еңбек сіңірген қайраткері, Мемлекеттік сый­лықтың иегері, жазушы Әкім Тарази, Қа­зақстанның еңбек сіңірген әртісі, компо­зитор Кеңес Дүйсекеев, ҚР Парламенті Мә­жілісінің депутаты Нұртай Сәбильянов болды.
Берік КӨШЕРБЕКҰЛЫ, Астанаға қоныс аударған тележүргізуші:
– Астанаға келгенде нағыз қыстың қандай болатынын тұңғыш рет сезіндім. Бірақ Астана маған 48 С-тық аязына қарамастан ұнады. Әсіресе елорданың төрінен орын тепкен Қазмедиа орталығы ерекше әдемі ғимарат екен. Ең соңғы заманауи құрал-жабдықтармен қамта­ма­сыз етілген медиаорталықта жұмыс істеудің өзі адамға қанат бітіреді. Бұдан кейін отандық ақпарат өнімдерінің сапа­сы артатынына шүбә келтіруге болмас.
Жаңа студияда жаңа сандық форматта эфирге шыққан Ұлттық арна ұлттық контенттің күн санап арта түсуі үшін ерекше қарқынмен іске кірісіп кетті.