Қазақ әйелі туралы көрме
Алматыдағы Ұлттық кітапхананың көрмелер залында Халықаралық әйелдер күніне орай «Әйел–әлем, әйел–өмір, әйел–жыр» атты көркем безендірілген кітап көрмесі ашылды.
Нәзікжандыларға арналған ерекше көрме үш бөлімнен тұрады. «Әйел – ұлттың діңгегі» атты бөлімде ҚР «Ерлер мен әйелдердің тең құқықтарының және тең мүмкіндіктерінің кепілдіктері туралы» Заңы, Қазақстанның гендерлік саясатының материалдары мен құжаттары ұсынылды.
Келесі бөлім «Ана ғұмыр» тақырыбын қамтыған.
Бұл бөлімге Қазақстан ақын-жазушыларының, көрнекті қайраткерлердің ардақты аналарға арналған еңбектері қойылды. Олардың арасында белгілі жазушы әрі драматург Тахауи Ахтановтың таңдаулы драмалық туындылары, қазақ халқының қаһарман перзенті Бауыржан Момышұлының «Музей апа» атты әңгімелер жинағы, халық жазушысы Әзілхан Нұршайықовтың еңбектері және т.б. көптеген материал бар.
Үшінші бөлім «Қазақстан өнерінің жұлдыздары» деп аталады. Бұл бөлімге қазақ халқының бұлбұлы Күләш Байсейітова, Халық Қаһарманы Роза Бағланова, КСРО халық әртісі Бибігүл Төлегенова, Қазақстаның халық әртістері Шара Жиенқұлова, Әмина Өмірзақова тағы басқалары туралы кітаптар мен құжаттар мен фотосуреттер қойылған. Көрме жұмысы аналар мерекесі өткенше жалғасады. Келем деушілерге есік ашық.
