Мүмкіндігі шектеулі болғанымен, қолы шебер

Семейдегі «Асыл» қоғамдық бірлестігінің ұйымдастыруымен «АҚШЫҢ» сауда орталығында мүмкіндігі шектеулі балалардың қолынан шыққан қолөнер бұйымдарының көрмесі өтті. Жарық дүниеге іңгәлап келгеннен тағдыр шырғалаңына тап болса да, ширығып өсуге әзір тұратын балалардың барлығы көп өнерге бейім екен.
Түрлі мате­риал­дар­дан жасалған кес­кіндеме-көріністердің, бұйымдардың қай-қайсына зер салсаңыз да, олардың қиялына қанат берген нәрсені жайдан-жай қабыл­да­май­тындығы айқын көрі­неді. Шеберліктерін шың­даумен қатар, олардың өз болашағын сонымен ұштастыра оты­рып, қоғамдық ортада ең­бек­қор­лығымен ор­нын қалыптастыруға ұмтылыстары барын да байқау қиын емес.
Толқын РАХМЕТУЛЛИНА, бірлестік мүшесі:
– Біздің «Асыл» қоғамдық бірлестігі жасы 18-ден асқан мүмкіндігі шектеулі балалары бар шаңырақтардың өзара ортақ шешімге келуінің нәтижесінде құрылды. Жалпы, мұнда «Асыл» арқы­лы өз орталарын тапқан жасы 18-ден 35-ке дейінгі жастар бар. Оларды сурет салуға, тігін тігуге баулып, келе­шекте өздеріне ұнайтын іспен айналысуына ұдайы мән беріп отырамыз. Осы шара­ны өткізудегі мақсатымыз – бала­ларымыздың өз қолымен жасаған еңбектерін көрсету.
Тек жекелей ғана емес, бірнеше бала­ның өзара бірлесе отырып, құрастыруының нәти­жесінде жасалған бұйымдар да көр­меге келушілердің назарын аударды. Он саусағынан өнер тамған шебердің ісінен кем түспейтін туындылардың ойдағыдай шығуына қолөнерді үйретуші ұстаз Қарлығаш Балтабекова екі жылдан бері баулып келеді екен. Қарлығаштың айтуын­ша, ақыл-есінің дамуы кешеуілдегенімен, олардың қиялын ояту үшін, негізінен, ашық түрдегі қызыл, жасыл түстерді, сондай-ақ жылтырақ заттарды қосу арқылы іс тігіп, бұйымдар жасаған тиімді.
Мемлекеттен қамқорлық күтпей-ақ өз қалауларымен қоғамдық бірлестік құрып, өз мүмкіндіктерін көрсетуді көздеген «Асылдағы» ата-аналардың жұмысы «Бота» қорының жобасы аясында қолдау көріп отыр. Тағдыр тауқыметін көрсе де, тауы шағылмай жүрген жандардың шама­лы да болса өз еңбегінің жемісін көргісі келген ниетін оң бағалаған көрмеге келу­шілер олардың жасаған бұйымдарын сатып алып жатты.