Мәдени саясат тұжырымдамасы талқыланды
ҚР Мәдениет және спорт министрлігінің әлеуметтік тапсырысы бойынша «Жерұйық» қоғамдық бірлестігінің жобасы шеңберінде Қазақ мемлекеттік қыздар педагогикалық университетінде Елбасы жолдауына байланысты және Мәдени саясат тұжырымдамасына қатысты ғылыми қызметкерлердің, мәдениет саласы мамандарының, ғалымдар және профессор-оқытушылардың, магистранттар мен студенттердің қатысуымен дөңгелек үстел өтті.
Дөңгелек үстел жұмысына қатысқан «Арсистем» қоғамдық бірлестігінің төрағасы Әділ Несіпбаев, «Алматы қаласының Азаматтық альянсы» ЗТБ президенті Сәулета Толғанбаева, ғылым докторы, профессор Хамза Ертазин, ғылым докторы, профессор Келіс Жайлыбай, ғылым докторы, профессор Қаламқас Әбдіқадірова, ғылым кандидаты, доцент Ақмарал Қожабекова және тағы басқалар тұжырымдама жобасы туралы өз пікір-ұсыныстарын ортаға сала келіп, негізінен мұндағы мәселелермен толықтай келісетіндіктерін айтты.
Ұлттың мәдени құндылықтарының дамуы – сол мемлекеттің толыққанды қалыптасуының басты тегершігі. Мұны қазақ елі де өз тәуелсіздігін алғаннан бері анық сезінді. Дамыған елдердің қол жеткізген жетістіктерінің басты ұстанымы - мәдени саясат пен рухани құндылықтар мемлекеттің идеологиялық бағыт-бағдары.
Осы мәселелер аталған дөңгелек стол барысында талқыланып, тиісті ұсыныстар айтылды. Қазіргі уақытта алдыңғы орынға ұшқырлық пен бәсекеге қабілеттілік шығады деген түйінді ойға келген мамандар Мәдениет тұжырымдамасы жобасындағы жаңашылдыққа қолдау білдірді.
