«Күн сақшылары» екі арнаны жалғастырады

Дәл сіз отырған үйдің не жеке мейрамхананың астынан қазына шығады десе, сенер ме едіңіз? Жоқ. Ал егер сол үйіңіз не мейрамханаңызды сат деп біреу күн сайын есігіңізді қаға берсе, тіпті қағу былай тұрсын, сыртыңыздан сізге қастандық ойластырып жүрсе ше? Онда еріксіз сескенуге тура келеді. Әсіресе «Ел арнаның» жаңадан көрсеткелі жатқан сериалын тамашалағаннан кейін.
Оқиғаны баяндап бермей-ақ, қысқаша айтсақ: балгер әйел, жігерсіз жігіт, өткен және келешек оқиғалар жайлы болжам, әке өсиеті... Немесе үйінен қашып бара жатқан қыз, оқуға түсерде «шпаргалкамен» комиссияға ұсталып, шарасыздан қашып бара жатқан жігітке тап болады. Тағдыр жігітті қыздың көлігіне аспаннан топ етіп түсірген еді. Міне, бас­талуы осындай фильмнің ары қарай­ғы оқиғасы неге ұласуы мүмкін? Шым-шытырық оқиға болары сөзсіз. Себебі...
Біріншіден, фильмнің түсіру тобы бұған дейін киногерлер тарапынан жақсы баға­сын алып үлгерген мамандардан тұрады. Продюсері – «Болашақ» бағдарламасының түлегі Ахат Ыбраев. Ол киносүйер қауымға «Аңыздар кітабы. Құпиялы орман» фильмі арқылы жақсы таныс. Сценарий авторлары – Валерия Плотникова мен Рустам Ниязов. Ал режиссер ретінде шақырылған әйгілі Ли Страсберг театр және кино инсти­туты­ның (Нью-Йорк) түлегі Санжар Сұлта­нов­тың бұл Қазақстандағы алғашқы жұмысы болмақ. Канадада тұратын қандасымыз осы­дан үш жыл бұрын Джек Лондон рома­нының же­лісі бойынша «Уақыт күтпейді» атты фильм түсірген. Сериалға, негізінен, көп­ші­лік­ке танылып үлгерген Нұржан Тұтов, Ару­жан Жазылбекова, Артур Төле­пов, Шәріп Серік, Жанат Тынбаев, Рүстем Жанаманов, Жұл­дыз Маханова сынды жас актерлер түскен.
Қазан айынан бастап арнадан жарқ ете түсе­тін жаңа телехикаяның мазмұны жай­лы қыс­қаша продюсері Ахат Ыбыраев былай деді:
– Сериалдың мағынасы «Сен де бір кірпіш дүниеге, Кетігін тап та, бар, қалан» деген жолдарға келеді. Бізде бұл ой кафенің астында қазына жасырылған деген мета­фо­радан көрініс тапқан. Яғни әр адам қазы­на­ны шеттен емес, өз ішінен іздеу керек, өзің­нен қашудың қажеті жоқ дегенді айт­қы­мыз келеді.
Форматы жағынан, операторлық жұ­мыс, музыкамен көркемдеу және режис­сер­дің оқиғалар желісін бір-бірімен тоғыс­тыруы тұрғысынан бұрынғыға еш ұқса­май­тын жаңа леп бар. 
Серік Абас-шах, «Ел арна» телеарнасының директоры:
– Бұл сериал қазақстандық жастарға және отбасылық аудиторияға қызық бола­ды деп сенеміз. «Күн сақ­шы­ла­рында» адам­дар арасындағы қарым-қатынас мәселелері мен махаббат тақырыбы көтеріледі. Ерек­шелігі – қанық бояулары мен пәлсапалық құра­мы. Біз алдына мақсат қою мен адал, ең­бекқор болудың маңыздылығын баса айтқымыз келеді. «Күн сақшылары» «Ел арнадағы» сериалдар легін жалғас­ты­ра­ды, және бұл – көрермендерге дайын­даған сыйлығымыздың соңғысы емес.
Әлі арнаға шықпай тұрып, яғни қыр­күйек­тің 20-сынан бастап күні ғаламтор желісінде жарияланған телехикаяның рес­ми трейлерінің өзі 65 мыңнан астам көр­се­тілім жинап үлгерді. Естеріңізге сала кетейік, «Күн сақшылары» телехикаясы «Ел арна» телеарнасынан қазанның бірінен бас­тап, кешкі сағат 22.10-да көрсетіле бас­тады.