Ерлігі елге мұра болған Қапай батыр

Ер есімі – ел есінде. Шығыс Қазақстан облысының Жарма ауданында Отанын қорғауда ержүректік танытқан Кеңес Одағының Батыры Қапай Ысқақовтың құрметіне орай ескерткіш тақта бой көтерді.
Салтанатты шараға Қапай батыр атын­да­ғы мектеп ұжымы мен оқушылар қатыс­ты. Мерейлі рәсімді ашу құрметі аудан басшысы Т. Қасымжанов пен еңбегі сіңген құрылысшы С.Х.Шәріповке берілді. Сөз алған ел ағалары сұрапыл соғыста кеудесін оқ пен отқа тосқан майдангерлерді ұмыту мүмкін еместігін баса айтты. «Мұн­дай ес­керт­кіш тақтаның бой көтеруінде де үлкен мән бар. Ерлікпен қаза болған Кеңес Одағының Ба­ты­рының атан кейінгі ұрпақ әркез жадында сақтап жүруіне осындай игі бас­тама үлкен септігін тигізері сөзсіз», – де­ді.
Жармадан сұрапыл соғысқа аттанған 12 523 жауынгер­дің ішінде батыр атағына ие болған тоғыз ердің ішінде болған Қапай Ысқақовтың ерен ерлігін жерлестері ешқа­шан ұмытпақ емес.
Дүние отқа оранып, оқ ауада зулаған қанды майданда сегіз рет ауыр, сегіз рет жеңіл жараланған ол 1418 күн мен түнге созылған соғыста қайталанбас ерлігімен танылған еді.
Облыс орталығы Өскеменге қарай ба­ғыт­талған жолдың бойынан іргесі қаланған әсем ескерткіш батыр Қапай Ысқақовтың отансүйгіштігі мен ерлігінің өшпес белгісі болып қала бермек. Салта­натты шара кезінде ескерткішке гүл шоқта­ры қойылып, шашу шашылды.