Құрметті «Алаш айнасы» сайтының оқырмандары! Біздің сайттағы «... ДЕПТІ» айдарында бұдан былай сіздердің назарларыңызға халық арасында айтылған әзіл-шыны аралас әңгімелер мен кей қалжыңқойлардың оқыстан, дер кезінде дөп басып айтқан сөздерін кезең-кезеңімен ұсынатын боламыз..
Май мен су
Елуінші жылдардың орта тұсында Жазушылар одағында драматургияның келелі мәселелері туралы жиналыс өтіп жатады. Бір кезде сөз кезегі халқымыздың қадірменді өнерпазы, белгілі актер Серке Қожамқұловқа беріледі. Ұлы актер баппен басып мінбеге көтеріледі. Жұртшылыққа қарап, болар-болмас жымиып қояды. Сонан соң әр сөзін әдеттегідей шегелей сөйлеп кетеді. Сөз арасында:
– Баяғыда Гоголь «Өлі жандар» атты романының екінші томын өз қолымен өртеп жіберіпті. Сөйтіп өнердің парқына өлермендіктің нарқын құрбан еткен ғой... Ал біздің Н. секілді драматургіміздің жазған пьесаларының үстіне бензин құйып өртесең де жанбайды. Себеп неде десеңіздер, себебі Гоголь шығармалары тұп-тұтас май. Ал біздің сабаздікі – кілең су. Су отқа жанушы ма еді!– деген екен.
Гүлдену мен пісу
Белгілі фототілші Сайлау Пернебаев бірде туған ауылына барады. Ауыл адамдарының бірі жыға танып, бірі шырамытып көптен көрмеген Сайлауға сәлем беріп жатады.
Осындай жағдайда ауылдың егделеу бір адамы келіп сәлемдескен соң:
– Ау, осы сен Пернебайдың баласы емеспісің, сырт бәденің келіп тұр!– дейді.
– Болсақ болармыз,– деп Сайлау сыпайы ғана жауап қатады.
Ал ақсақал болса онымен қоймайды, қазақы ашықтықпен:
– Бала кезіңде көмірдей қара шашың көзіңді жауып, ертеден қара кешке дейін асыр салып ойнаушы едің. Енді міне, сенің де шашыңа ақ кіріпті, – дейді ғой.
Сонда Сайлау тұрып:
– Ақсақал, шаштың ағарғаны – гүлдегені, түсе бастағаны – піскені болады!– деген екен.
Қайратты іздегенде
Ақындар Хамит Ерғалиев пен Сырбай Мәуленов «Жазушы» баспасына келеді. Хамаң ана есікті бір ашып, мына есікті бір ашып ақын інісі Қайрат Жұмағалиевті іздейді. Жуық маңда табыла қоймайды. Хамаң шарқ ұруын қоймайды. Жанында жүріп әбден төзімі таусылған Сырағаң сонда шыдамай кетіп:
Ойпыр-ай, Қайрат қайда, Қайрат қайда?
Қайратсыз күнім туып, ай батпай ма.
Хамаңның қалтасында он сом жатыр,
Сол бізді Қайратсыз да сайратпай ма?!– деген екен.
Рақымжанның ренжіші
Шетен қалпақ
Тапқыр жауап
Жаман Хама
Өкше басар іні
… депті жинағының сілтемесіне басыңыз