«Біржан сал» жайлы тұңғыш фильм түсірілді

Өткен жылдың тамызында табиғаты ғажайып Бурабай баурайында бастау алған Біржан сал жайлы фильм түсіру идеясы бір жылда пісіп, өз жемісін беріп үлгерді. Солайша дәл елорданың туған күнінде  «Самұрық» кинотеатрында «Біржан сал» деп аталатын жаңа туындының тұсауы кесілді.
Кино   идеясының авторы, әрі   режи­ссері, сондай-ақ басты рөлді сом­дау­шы да – Досқан Жолжақсынов.  Сце­нарийін белгілі жазушы, сыншы Таласбек Әсемқұлов жаз­са, жүрек тербетер бұл фильмнің сазгері – Төлеген Мұхамеджанов.
Идеясынан бастап соңғы нүктесіне дейін кәсіби мамандардың қолынан шық­қан бұл туынды несімен ерекше? Біріншіден, фильмге арқау болған кейіп­кердің өзі – қазақтың кесек тұлғаларының бірі, серілігімен есімі дүйім елге белгілі болған – «Біржан сал». Екіншіден, әншінің қайталанбас бейнесі бұрындары опера, драма театрларында сомдалғанымен, фильмде алғашқы рет көрініп отыр. Осы­нау қазақ жерінің, оның ішінде Көкше даласының сұлулығын, халқының кеңдігі мен қонақжайлылығын, салт-дәстүрі мен ғұрпын толық қамтыған  «Біржан сал» туындысында Халық әртісі Хабиба Елебекова, Сәбит Оразбаев сынды сахна мен кино тарландары да ойнайды.