БАТА
Құрметті оқырман ел аузындағы бата-тілектерді жинасытырып назарларыңызға ұсына бастадық. Бұл игі іске алып-қосар ойыңыз немесе өз жаныңыздан шығарған, ел аузынан, қадірлі қариялардан естіген баталарыңыз болса alashainasy.kz сайтына пікір жазып немесе мына почтаға (alashbata@mail.ru) хат жолдаңыз!
***
Әуелі, құдай оңдай көр,
Оң жолына бастай көр,
Адасса жолға сала көр,
Сүрінсе қолдан ала көр!
Кездессе шайтан қаға көр!
Жұлдыздармен жалғастыр,
Жақсылармен жанастыр,
Жамандардан адастыр!
***
Бұрама темір, сым темір,
Отқа салса жанбасын,
Суға салса батпасын.
Тәңір берген нәсібе
Тепкілесе кетпесін!
***
Құдайың оңдасын,
Әулиең қолдасын.
Кеткенің келсін,
Кемісің толсын!
***
Айдай жарқыра,
Жұлдыздай жылтыра,
Маңдайың ашық болсын,
Дұшпаның қашық болсын!
***
Ай көрдім,
Аман көрдім.
Ақиретте иман көрдім,
Баяғыдай заман көрдім,
Ескі айда есірке,
Жаңа айда жарылқа!
***
Өркенің өссін,
Өрісің кеңейсін.
Ат жалын тартып мініп,
Халқыңның қамын жегейсің.
Тілеуіңді беріп,
Бағыңды ашсын.
Айналып келіп ай мен жыл,
Аман-есен көруге жазсын!
***
Тәңірім жаздай берсін,
Жаздай берсе, жазылып
Көкірегіңді иман оты маздай берсін.
Тәңірім күздей берсін,
Күздей берсе, құтайып
Риздығың маңдай термен іздей берсін.
Тәңірім кыстай берсін,
Қыстай берсе, қысылмай
Ынсаппен тізгінің тең ұстай берсін.
Тәңірім көктемдей берсін,
Көктемде көктей өңіп,
Талабың көкке өрлей берсін!
***
Дәулетің зияда болсын,
Дұшпаның қияда болсын,
Аққұларың ұяда болсын,
Ауыл-аймақ,
Бота, тайлақ,
Үй-жамағат -
Бәрі түгел аман болсын!
Кейінгіге береке берсін.
Алғанда азда болса көптей көр,
Бергенде көлдей бол.
Жарылқасын құдайым,
Тартпасын халық уайым,
Өткеннің есесін,
Кеткеннің берекесін берсін.
От басы, ошақ қасы,
Түгел аман болсын!
***
Құдай жарылқасын!
Бай қылсын!
Бақ қарасын!
Қыдыр дарысын!
Аруақ жебесін!
Дастарқанға береке берсін!
Кең пейіл берсін!
Ұзақ өмір берсін!
От айнала бас берсін,
Өріс толы мал берсін!
Айдан аман сақта,
Жылдан есен сақта!
Жүз бір қатерден сақта,
Мың бір пәледен сақта!
Ізет, абырой, бақ-даулет,
Ризық, несібең арта берсін!
***
Бай қылсын,
Төрт түлікті сай қылсын
Кетпес дәулет берсін,
Отауыңа сәулет берсін.
Бастарыңа бақыт қонсың,
Қастарыңа нөкер толсын.
Дұшпандарың жоқ болсын.
Көре алмаған қаскөйдің
Іші күйіп шоқ болсын.
Ризық, нәсібің тасып,
Көңілдерің тоқ болсын.
Туған балаларың ержетіп,
Өсіп, үлкен ел болсын.
Дәулетің шалқып, сел болсын,
Дастарқаның кең болсын!
Жарылқа, тәңірім, қабыл ет.
Ұлыс күні қазан толcа
Қарық қып құтты Наурыз
Құрдасыңа – қуаныш бол
Уа, жаратқан, жарылқа
Құдайдың өзі сөйтіп оңдасын
Бата жинағының сілтемесіне басыңыз
Әумин десең маған
Жас баланың күлкісін бер
Жаңбырсыз жаздан сақта
Анаға бата
