Ахмеди тағылымы

Таяуда Абай атындағы ҚазҰПУ-дың бас ғимаратының үлкен мәжіліс залында А.Байтұрсынұлы атындағы Тіл білімі институты мен ҚР Мәдениет министрлігінің Тіл комитетінің бірлесе ұйымдасуымен қазақ тіл білімінің негізін салушы аса көрнекті ғалым, профессор, филология ғылымының докторы ҚазКСР ҒА корреспондент-мүшесі Ахмеди Ысқақұлының туғанына 100 жыл толуына орай, «Қазіргі қазақ грамматикасы мен терминологиясын зерттеудің негізгі бағыттары» атты халықаралық ғылыми-теориялық конференция өтті.
Конференцияға ҚР Үкіметі жанындағы терминологиялық комиссияның мүшелері: белгілі классик аудармашы, «Қазақ әлемі», «Литературный Казахстан» журналдарының бас редакторы К.Юсуп, тіл жанашыры, медицина ғылымының кандидаты, профессор М.Ахметов, сонымен қатар филология ғылымының докторы, профессор Ж.Әбуов, ҚР ҰҒА академиктері Ә.Қайдар, Р.Сыздық сынды белгілі тілші ғалымдар қатысты.
Тіл төңірегіндегі түрлі зерттеулерге шолу жасаған жиынды А.Байтұрсынұлы атындағы Тіл білімі институтының директоры, филология ғылымының докторы Ш.Құрманбайұлы ашып, аталған тақырыпқа орай ой-пікірін ортаға салды. «Профессор А.Ысқақов және қазақ грамматикасы» атты негізгі баяндаманы жасаған филология ғылымдарының докторы, профессор Е.Жанпейісов ғалымның өмір жолы мен қазақ тілі мәселесіне арнаған ғылыми зерттеулерін және қазақ грамматикасы мен морфологиясының мәселелерін жан-жақты талдап көрсетті. Конференцияда ғалымның өмір жолы мен ғылым жолынан сыр шертетін естелік суреттері слайд арқылы қатысушы қауымға көрсетілді. Сонымен қатар Астанадан келген қонақтар мен ізбасар шәкірттері Ахмеди Ысқақұлы жайлы естеліктер айтып, артында қалған мол ғылыми мұрасының баға жетпес құнды екендігін баса айтты.
Конференцияның алқалық жиыны секциялық мәжілісте жалғасын тапты. Пікір бөлісіп, тәжірибе алмасу мақсатында қолға алынған секцияда жоғары оқу орындарының оқытушылары мен А.Байтұрсынұлы атындағы Тіл білімі институтының қызметкерлері профессор А.Ысқақовтың морфология іліміне қосқан үлесі туралы және грамматиканың өзекті мәселелеріне арналған баяндамалар жасады. Алдағы уақытта осы ғылыми конференцияның материалдары А.Байтұрсынұлы атындағы Тіл білімі институтында жинақ түрінде жарияланады.