Әріптестеріміз марапатталды

Жыл қорытындалар шақта, ақпарат айдынына жол тартқанына бір жыл толған газетіміздің жеңісті де жемісті қадамдары айқындалуда. Соның бірі 23 желтоқсан күні Ақ Жайықтан ән оздырған жезтаңдай әнші,  қазақ опера өнерінің негізін қалаушы Ғарифолла Құрманғалиевтің 100 жылдық мерейтойына орай Алматы қалалық мәдениет басқармасының қазақ баспасөздері арасында ұйымдастырған байқауында «Алаш айнасы» дүлдүл әншінің мерейтойы жайлы жыл бойына үздіксіз материалдар беріп отырған бірден-бір басылым ретінде алғысқа ие болып, газетіміздің Өркениет бөлімінің тілшісі Мәриям ӘБСАТТАР басқарманың арнайы ақшалай сыйақысына ие болды. 

Кеше «Қазақфильм» киностудиясына қатысты қазақ кинематография саласының көрнекті қайраткері Ш.Аймановтың аты берілуінің 25 жылдығына орай ұйымдастырылған  БАҚ арасындағы байқаудан газетіміздің мәдениет бөлімінің тілшілері Роза ҚАРАЕВА мен Айнұр СЕНБАЕВА үздік мақала иелері деп танылып, арнайы жүлделермен марапатталды.

Қазақстан қор биржасы  үстіміздегі жылы еліміздің қор нарығын БАҚ-та асқан кәсіби шеберлікпен насихаттаған баспасөз өкілдерін арнайы сыйлықтармен марапаттады. Газетіміздің Экономика бөлімінің тілшісі, белгілі журналист Анар Қуанышбекова осы орайда «Ең үздік қазақтілді журналист» номинациясын иемденді.

«Алаш айнасының» абыройын асқақтатқан әріптестерімізді шын жүректен құттықтай отырып, алдағы жылы да осындай табыстарға жете берсін деп тілейміз.