Ақжайықты ән тербеді

Атырауда батыстың дәстүрлі ән мектебінің негізін қалаушы, осы өңірдің кең тынысты біртуар әншісі – Мұхиттың әндерін бүгінге жеткізуші Қазақстанның Халық әртісі Ғарифолла Құрманғалиевтің туға­нына 100 жыл толуына орай «Ақжайық­тан ән оздырған» атты аймақ­тық әншілер байқауы өтті. Оған қатысқан әншілерді сұрыптауда қазылар алқасы барынша әділ­дік танытуға тырысты.
Атырау облыстық мәдениет басқар­масы мен Халық шы­ғармашылығы орта­лығының ұйымдастыруымен өт­кен мә­дени шараның ашылу салтанатында, ең ал­ды­мен, батыстың дәстүрлі әндерін орын­даушы орал­дық Қатимол­ла Бердіғалиев, Ғарекеңнің шәкірт­тері Сәу­ле, Гүлмайдан мен Мейрамгүл Орашева, Қай­рат Қаки­мов­тар кез келген ән­ші­нің дауысы жете бер­мей­тін кең тынысты әндер­дің күр­де­лілерін халық ал­дын­да шыр­қап беріп, байқауға қатысушыларға ақ жол ті­ле­ді.
Екі күн бойы батыстың кең тынысты дәстүрлі ән­де­рі шырқалған Ғарекең атын­дағы ай­мақ­­тық байқаудың қорытын­ды­сында бас жүлдеге келгенде пікірі екі жа­рылған қазылар алқасы оны әйел және ер дауысты деп бөліп қарастырды. Сонымен, қос бас жүлде Ба­тыс Қазақстан облысы Ғ.Құрманғалиев атындағы об­лыс­тық филармониясының «Орал сазы» фольклорлық ан­сам­блінің әншісі Күләш Қуаныш­қа­лие­ва мен Аты­рау облысының Индер ауданының тұр­ғ­ы­ны, елу жыл ғұ­мырында Ғарекең әндерін нақы­шына кел­ті­ріп орындауымен көзге түсіп жүрген алыс ауыл­дағы та­лантты өнерпаз Айдар Иманғалиевқа бұйырды.