Аязби БЕЙСЕНҚҰЛОВ, «Хабар» агенттігі» АҚ «Білім» арнасының бас редакторы:
Елімізде өткен жылдың 5 қыркүйегінде танымдық-ағартушылық бағыттағы «Білім» телеарнасының тұсауы кесілген еді. «Хабар» телеотбасының құрамына кіретін арнаның басты мақсаты отандық білім мен ақпарат саласын жаңа сапалы деңгейге көтеру екені көпшілікке мәлім. Арнаның шымылдығы ашылған мезеттен бастап 700 сағаттан аса танымдық, ғылыми бағдарламалардың алғашқы көрсетілімі болды, 2000 сағаттан астам BBC, Discovery, National Geographic, History ұсынған деректі фильмдер мен телехикаялары эфирге шықты. Арнаның қалыптасу кезеңі мен бір жылда қол жеткізген жетістіктері туралы «Білім» арнасының бас редакторы Аязби Бейсенқұловпен аз-кем әңгімелескен едік.
– Аязби Ақбергенұлы, бір жылда қандай жетістіктерге қол жеткізе алдыңыздар?
– Негізі, аяғымыздан тұрып, елге жетуіміздің өзі үлкен жетістік деп бағалаймын. Бір жылда бәрін бітіріп қойдық деу де әбестік болар. Өйткені біз бұрын-соңды мұндай ауқымда болмаған, тек қана білім беруге бағытталған дүниелерді эфирге шығардық. Оның 40%-ы – мектепке немесе басқа да білім ұяларының шәкірттеріне базалық білімді тарататын оқу бағдарламалары. Түрлі тәжірибелер, техника мен ғылым жетістіктері, мысалы, биология, нанотехнология сияқты іргелі ғылыми салалардағы жаңалықтар көрерменге жол тартты. Тарихи танымдық бағыттағы дүниелер – өз алдына бір төбе. Тіл үйрену мектебінің де өзіндік қолтаңбасы бар. Ең бастысы, әр көрермен бойында өмір бойы оқу, іздену ұстанымын нығайтуға ұмтылдық. Өткен бір жылда атқарылған істер мол болғанымен, алар асуымыз әлі алда деп есептеймін.
– Қалыптасу кезеңінде қандай қиындықтар кездесті?
– Жаңа медиаорталықта маман тапшылығы алдан шықты, жастар жұмысқа тартылды. Оларға жағдай жасау, шығармашылық ізденістерін ынталандырып отыру қажет болды. Көпшілікке білім таратумен қатар, өзіміз де үйрендік, оқыдық, іздендік. Сөйтіп, алғашқы жыл қалыптасу, жаңа міндеттерді шешудегі ізденіске толы мазасыз уақыт болды. Арнаның болашақтағы дамуына алғышарттар жасалды.
– Ұжым туралы не айтасыз?
– Ұжымда бірді-екілі ғана ересек адамдар бар, басым көпшілігі – еңбекке жаңа араласқан 23-24-тегі жастар. Яғни жастарға тән қызбалық, биікке ұмтылу, тез нәтижеге жету сияқты жақсы қасиеттер басым. Содан жастықтың албырттығы да кейде нәтиже беріп жатады.
– Арналарыңыздан жарық көрген жобалардың ішінен қайсысын ерекше атап өтер едіңіз?
– Эфирдің төрттен бір бөлігін, яғни 25%-ын шетелдік өнімдер құрады. Бұлар – әлем мойындаған үздіктердің деректі фильмдері мен танымдық дүниелері. Сондықтан әзірге бізде төл туындыларымыздан гөрі, сол дайын өнімдерді насихаттау көбірек сияқты. «Назарбаев универсиеті», «Жеті муза», «Ғажайып туынды», «Эйнштейн ізімен» секілді жақсы-жақсы жобаларды жарыққа шығардық.
– Жаңа маусымның жаңалығы қандай?
– Жаңалық көп. Тарихи-деректі фильмдерді қолға алдық. Жақында қазақтың ежелгі өнерін терең насихаттайтын «Қазақтың сәндік-қолданбалы өнері» бағдарламасын жарыққа шығармақпыз. Аталмыш циклде киіз басу, ұсталық, тоқыма, зергерлік, ағаш өңдеудің технологиясы барынша тарқатылып көрсетіледі. Жуырда «Дискавери» ұсынған «Морган Фриманмен бірге уақыт пен кеңістік тылсымына бойлау» жобасын көрермен назарына қазақ тілінде ұсынбақпыз. Көрерменіміздің ағартушылық бағыттағы сұранысын қанағаттандырарарлық арна жұмысы жанданып келеді. Оның өз міндетін абыроймен атқаратынына кәміл сенемін.
А.САМАЛБЕКҚЫЗЫ