Қарияларға құрмет көрсету – парыз
Қоғамның дамуы адам еңбегінің жемісі. Сондықтан еңбек адамы әрқашан да қадірлі. Елбасымыз Қазақстан халқына жолдаған Жолдауында мемлекеттің басты байлығы – адам капиталы екенін әрдайым айтып келеді. Елімізді мекендеген көптеген ұлттардың еңбек етіп, тату-тәтті тіршілік кешуі Мемлекет басшысының парасатты саясатының арқасында іске асып жатқан жұмыстардың жемісі деуге болады. Сондықтан, өмір бойы осы елде еңбек етіп, мемлекеттің дамуына үлес қосқан әрбір жан, әрбір ұлттың өкілі қоғам назарынан тыс қалмауы керек. Осы бағытта Алматы қаласында атқарылып жатқан игі істер баршылық. Оның айқын дәлелінің бірі ретінде өткен айда өткен «Қарттар айлығы» іс-шарасын айтуға болады. Ізгі ниетпен жүргізілген шараның арқасында қаладағы қариялар бір серпіліп қалғандай болды. Бұдан бөлек жыл бойы қарияларға қамқорлық жасап, көмек көрсету тоқтаған емес. Әр түрлі мерекелерде қалалық әкімдік тарапынан дастархан жайылып, байқаулар, салауатты өмір салтын насихаттаған шеберлік сағаттары, тіл үйрету курстары ұйымдастырылып келеді. Осының бәрі зейнеткер-ардагерлерді қадірлеп-құрметтеуге бағытталған істер.
Қазыналы қарияларымызды аялау, ардақтау, құрметтеу әрбір азаматтың парызы. Осындай игі шаралар қаланың барлық ауданында қолға алынып, ардагерлерге қамқорлық көрсету жалғасын тауып жатыр. Жақында ғана Алматы қаласындағы Бостандық ауданы әкімі аппаратының әлеуметтік қызметкерлері аудан тұрғыны 90 жасқа толып отырған Лебедева Анастасия Александровнаны үйіне барып, қалалық Мәслихат депутаты Шыныбеков Дамирдің атынан құттықтап қайтты. Қария 1928 жылы 7 қараша күні дүниеге келген. Анастасия Александровна жалындаған жастық шағында тылда еңбек еткен.
Қарт әжеге ұзақ ғұмыр, зор денсаулық тілеген аудандық әлеуметтік қызметкерлер сыйлық пен азық түлік дорбасын тарту етті. Қария да құттықтаушыларға өз разылығын білдіріп ақ тілегін ақтарды.
Қариялардың батасы мен алғысын алу жас ұрпақ үшін үлгі-өнеге. Сондықтан қазыналы қариялармыздың ұлтына, ұлысына қарамай құрмет көрсету жалғасын тауып, толастамауы керек.
Нұрлы Еділов
