Біздің мақсатымыз – ынтымақ пен бірлік

1 мамыр – Қазақстан халқы­ның бірлігі күні мерекесі егеменді еліміздің тарихындағы айтулы мерекелердің бірі. 130 ұлт өкілінің тарихи Отанына айналған Қазақ­стан атты қасиетті қара шаңырақ аясында ынтымақта тату-тәтті өмір сүріп жатқан достық мерекесі. Бірлігі мен татулығы жарасқан Қазақстан халқын рухани тұрғыда байланыстыра түсетін бұл мереке­нің маңызы зор дейді Алматы ақшамы газеті.

Қазақстан Президентінің «Ел бірлігі – ең асыл қасиет» деп атап көрсеткеніндей, қасиетті қазақ жерін мекендеген ұлттар мен ұлыстардың бірлігі мен достығы жарасымды достыққа құрылған.

Қазақстан халқының бірлігі күні мерекесі – қазақстандық патриотизмнің, елге және халыққа деген адалдықтың мерекесі. Оны Қазақстан халқы өздерінің шынайы істерімен көрсетіп келеді. Көп ұлтты мемлекетімізде ынты­мақ пен бірлікті нығайта түсу үшін барлық жағдай жасалған.

Қазақстан Президенті өзінің «Болашаққа бағдар: рухани жаң­ғыру» атты бағдарламасында ұлттың ұлы мұраты мен еліміздің рухани кеңістігін байыту жолында ізгілікті істерге бастамашылдық танытуға шақырғанын Қазақстан халқы Ассамблеясының мүшелері қызу қолдау білдіріп отыр.

Мемлекет басшысы Нұрсұл­тан Назарбаев Қазақстан халқы Ассамблеясының ХХV сессия­сында сөйлеген сөзінде халықтың рухани жаңғыруға белсене арала­сатынына сенім білдіріп, оның мүшелеріне өз әлеуетін жүзеге асыруға мүмкіндік беретін жағ­дай­ларға басымдық берілу қажет­тігін атап өтті. Шындығына кел­сек, ол еліміздің гүлденіп, көркеюі үшін қажет. Ұрпағымыздың сауатты әрі батыл болуы үшін өздері туып-өскен өлкені сүйіп жүруі үшін керек.

Қазір біз Тәуелсіз Қазақ­стан­ның мәуелі бәйтерегінің саясында өсіп-өнген, бір мықты бұтаққа айналған біртұтас елміз. Еңбегіміз елімізді гүлдендіруге бағытталып, ұрпағымызды көбейтіп, тату тіршілік кешудеміз.

Халық – барлық жерде халық, барлық жерде бірдей. Бәрі адам­ның ниет-қалауына байланысты. Еліміз егемен ел болды, еңселі мем­лекетке айналды. Әлемнің төрт бұрышы Қазақстан атты еңселі елімізді танып мойындады. Адамға бұдан артық қандай бақыт керек?!

Ең бастысы, қайбір зобалаң жылдары туған жерлерінен үдере көшіп келген түрлі ұлт өкілдері Қазақ елінен пана тауып, осы жерде ұрпақ өрбітті. Тілін де, ділін де, мәде­ниетін де жоғалтқан жоқ. Біз осы ортада жетілдік, арқамыз кеңіді.

Бүгінде қол жеткен табыста­рымыз, бұл – біздің тәуелсіздікпен бірге келген сыйымыз.

Күш – бірлікте, түсіністікте. Біздің бүгінгі мақсатымыз – бір­лігіміз бен ынтымағымызға сызат түсірмеу.

Георгий ИОРДАНИДИ,

грек мәдени орталығының төрағасы.