Алматының ардагерлері арасында сурет, қолөнер туындыларының көрмесі өтті

Алматы қаласында Астананың 20 жылдық мерейтойынның құрметіне орай ардагерлер арасында қолөнер бұйымдарының және көркем сурет туындыларының көрмесі өтті. Көрмеге қалаға қарасты барлық ауданның ардагерлері қатысып жасаған бұйымдарын, салған суреттерін келушілер назарына ұсынды.
Көрмеге қойылған туындылардың тақырыптары әр алуан. Елордамыз Астананы, асқақтаған Бәйтеректі бенелеген суреттер, әсем табиғаты, тауларды, табиғаттың небір тылсымдары мен қатар махаббат тақырыбындағы, патриоттық рухта саланған туындылар баршылық. Ардагер қариялар өз қолдарымен жасаған қолөнер бұйымдар көздің жауын алады. Мөлдіреген моншақтармен кестеленген туындыларға қайта-қайта қарай бергін келеді. Шығармашылық жұмыстардың әрқайсында да ардагерлер қолтаңбасы менмұндалап тұрғандай. Өйткені өмірлік тәжірибенің алар орны өнерде де ерекше ғой.
Көрмеге Түрксіб ауданының ардагерлері де қатысып салған суреттері мен қолөнер бұйымдарын ұсынды. Аудан бойынша қатысушылардың арасынан аудандық Халықтар Достығы фестивалі мен шығармашылық көрмелерден жиырма бес ардагер іріктеліп алынған еді. Олардың өнерлері өте жоғары деңгейде болды.
Өнер туындыларын саралай келе ұйымдастырушылар қатысушыларды жүлделі орындармен марапаттады. Қорытынды бойынша мөлдіреген майда моншақтан зерлеп кесте тігуден 1-орынды Т.Г. Подорогина иемденді. Ал 2-орынға халық суретшісі В.Гончаров пен квилинг-декупаж техникасының шебері Т.Г Губинаның туындылары лайық деп танылды. Жүлделі 3-орын Астана туралы мәнерлеп оқыған өлеңі үшін Т.Г Губинаға табысталды. «Россиянка» атты орыс әндерінің хор ансамблі қалалық Ардагерлер кеңесінің грамотасымен марапатталды.
Көрме соңы музыкалық-поэтикалық мерекелік шараға ұласты. Ардагер өнерпаздар ұйымдастырушыларға алғыс айтып тарасты. Бірлігі мен ынтымағы жарасқан елдің нышанын балалары мен қарияларынан жүзінен байқауға болады. Біз көрме-мереке қатысқан қариялардың бақытты жүзінен осыны байқадық.

Нұрлы Еділов