Қазақстандық оқушылар Балқан математикалық олимпиадасынан 6 медальды жеңіп алды, - деп хабарлайды Alashainasy.kz. Бұл туралы ҚазАқпарат тілшісі ҚР Оқу-ағарту министрлігінің баспасөз қызметіне сілтеме жасап жазды.
Баспасөз қызметінің мәліметтеріне қарағанда, 40-шы Балқан математикалық олимпиадасы Түркияның Анталия қаласында өтіп, Балқан түбегінің 22 елінен және қонақ мемлекеттерден 130-дан астам оқушы қатысқан.
Олимпиада қорытындысы бойынша Қазақстан атынан барған 6 оқушы да медальға ие болды.
Олар:
Байшуақ Райымбек – Алматы қаласындағы Республикалық физика-математика мектебінің 11 сынып оқушысы;
Юркевич Мирон - Алматы қаласының Республикалық физика-математика мектебінің 10 сынып оқушысы;
Жан Дәуітов – Қостанай облысы «Білім-инновация» мектеп-лицейінің 10 сынып оқушысы;
Марғұлан Шарел – Жамбыл облыстық дарынды ер балаларға арналған мамандандырылған «Білім-Инновация» лицейінің 10 сынып оқушысы;
Нағашыбек Мухаммед – Астана қаласы «NURORDA» мектеп-лицейінің 11 сынып оқушысы;
Владимир Роговский – Павлодар қаласының дарынды балаларға арналған № 8 мектеп-лицейінің 10 сынып оқушысы.
Айта кетейік, 40-шы Балқан математикалық олимпиадасының мақсаты – математика пәнінен дарынды оқушыларды ынталандыру және дамыту, қатысушы елдер арасында мектеп бағдарламалары мен тәжірибелері туралы ақпарат алмасу үшін мүмкіндіктер жасау. Сондай-ақ Халықаралық математика олимпиадасына (IMO) дайындалу және тәжірибе жинақтау.